ఆర‌డుగులు బుల్లెట్‌.. ఈ సినిమాని గోపీచంద్ కూడా మ‌ర్చిపోయి ఉంటాడు. కానీ నిర్మాత‌ల‌కు త‌ప్ప‌దు క‌దా..! `మా సినిమాని విడుద‌ల చేస్తాం. చేస్తాం..` అంటూ వీలైన‌ప్పుడ‌ల్లా ఓ ప్ర‌క‌ట‌న ప‌డేసి, ఆ త‌ర‌వాత‌… వాళ్లూ మ‌ర్చిపోతున్నారు. గోపీచంద్ – న‌య‌న‌తార జంట‌గా న‌టించిన సినిమా ఇది. బి.గోపాల్ ద‌ర్శ‌కుడు. మూడేళ్ల క్రిత‌మే విడుద‌ల కావాలి. కానీ ఆర్థిక కార‌ణాల‌తో ఆగిపోయింది. చాలాసార్లు ఈసినిమా విడుద‌ల తేదీ ప్ర‌క‌టించారు. కానీ కుద‌ర్లేదు. ఇప్పుడు ఈ బుల్లెట్ ని దించే అవ‌కాశం మ‌రోసారి వ‌చ్చింది. గోపీచంద్ క‌థానాయ‌కుడిగా న‌టించిన `సిటీమార్‌` ఈ శుక్ర‌వార‌మే విడుద‌లైంది. తొలి రోజు ఈ సినిమాకి మంచి ఓపెనింగ్సే వ‌చ్చాయి. దాంతో.. ఆర‌గ‌డుగుల బుల్లెట్ నిర్మాత‌ల‌కు కాస్త ధైర్యం వ‌చ్చింది. అక్టోబ‌రులో మా సినిమాని విడుద‌ల చేస్తాం.. అని మ‌రోసారి స‌రికొత్త‌గా ప్ర‌క‌టించారు. ఈలోగా త‌మ ఆర్థిక వ్య‌వ‌హారాల‌న్నీ సెటిల్ అవ్వాలి మ‌రి. అయితే స‌రి. లేదంటే… మ‌రోసారి వాయిదా ప‌డుతుంది. ఈసారి వాయిదా ప‌డితే మాత్రం… నిజంగానే ఈసినిమాని థియేట‌ర్లోకి విడుద‌ల చేసినా – జ‌నం లైట్ తీసేసుకుంటారు.