ఆంధ్రప్రదేశ్‌లో నేరాలు 63 శాతం పెరిగిపోయాయని జాతీయ నేర గణాంక సంస్థ లెక్కలు విడుదల చేసింది. ఈ రికార్డులన్నీ పక్కాగా ఉన్నాయి. అయితే పోలీసులు మాత్రం తమదైన లెక్కలు విడుదల చేశారు. ఏపీలో పదిహేను శాతం కేసులు తగ్గాయట. ఎందుకంటే కాగ్నిజబుల్ నేరాలను మాత్రమే పోలీసులు పరిగణనలోకి తీసుకున్నారు. అంటే నేర స్వభావం ఉన్న కేసులు మాత్రమే లెక్కలోకి తీసుకుంటే ఏపీలో కేసులు తగ్గాయని చెబుతున్నారు. నేరస్వభావం లేనివి అంటే ఎస్‌ఈబీ కేసులు, కరోనా నిబంధనల ఉల్లంఘన కేసులు అని పోలీసులు చెబుతున్నారు. మద్యం, ఇసుక అక్రమ రవాణా వ్యవహారాలపై పెద్ద ఎత్తున కేసులు పెట్టామని అవేమీ లెక్కలోకి రావని అంటున్నారు. వాటిని తీసేస్తే తమ పనితీరు చాలా మెరుగ్గా ఉందని కేసులను కట్టడి చేశామని చెప్పుకొచ్చారు.

కరోనా వ్యాప్తిని కట్టడి చేసే చర్యల్లో భాగంగా లాక్‌డౌన్, కర్ఫ్యూలను అమలు చేసేందుకు పోలీసులు నమోదు చేసిన కేసులే ఎక్కువగా ఉన్నాయి. ఇసుక, మద్యం అక్రమ రవాణాను అరికట్టేందుకు ఉద్దేశించిన కేసులు కూడా అధికమేనని అవి శాంతిభద్రతలకు సంబంధించినవి కావని పోలీసులు చెప్పుకొచ్చారు. 2019లో రాష్ట్రంలో ఐపీసీ సెక్షన్ల కింద 1,19,229 కేసులు నమోదయ్యాయి. కాగా, 2020లో 1,88,997 కేసులు నమోదు చేశారు. ఇంత స్పష్టంగా పెరుగుదల కనిపిస్తున్నా.. వాటిలో ఎనభై వేల కేసులు కరోనా కట్టడి కేసులని పోలీసులు చెబుతున్నారు. అలాంటి వాటికి కూడా ఎందుకు కేసులు పెడుతున్నారంటే చట్టాన్ని పటిష్టంగా అమలు చేయడానికేనని చెబుతున్నారు.

రాజకీయ కారణలతో పెట్టే కేసులు ఎక్కువ కావడంతోనే ఈ సమస్య వచ్చిందని.. ఇష్టం లేని వారు ఎవరు రోడ్డుపైకి వచ్చినా కరోనా కట్టడి పేరుతో కేసులు పెట్టారన్న ఆరోపణలు ఉన్నాయి. మొత్తంగా చూస్తే కేసులువిపరీతంగా పెరిగినా తగ్గాయని పోలీసులు సమర్థించుకోవడానికి ప్రయత్నించడం.. జాతీయ నేర గణాంక రికార్డు కళ్ల ముందు ఉన్నా.. నమోదైన కేసులన్నీ నేర స్వభావం ఉన్నవి కావని చెప్పడం పోలీసులు ఉన్న పరిస్థితికి నిదర్శనంగా మారిందన్న అభిప్రాయాలు ఉన్నాయి. నేర స్వభావం లేనప్పుడు కేసులు ఎందుకు పెట్టారో కూడా వివరించాల్సి ఉంది.