మెగా బ్రదర్ నాగబాబు, మోహన్ బాబు పై సెటైర్ వేశారు. ఊరిని ఉద్దరించే ముందు ఇంటిని మరమ్మతు చేసుకోవడం ముఖ్యం అంటూ పరోక్షంగా వేసిన సెటైర్ మోహన్ బాబు ని ఉద్దేశించే అన్న చర్చ జరగడం తో ఇది సోషల్ మీడియాలో వైరల్ గా మారింది. వివరాల్లోకి వెళితే..
నాగబాబు సోషల్ మీడియాలో పోస్ట్ చేస్తూ, ” మన రాష్ట్రంలోని దుస్థితి ఏమిటంటే జన సేవకు కూడా ఒక యుద్ధం చేయవలసి వస్తుంది. అవతల వారి నుండి తీవ్రమైన ఒత్తిడి లు ఉన్నా, దేనికీ బెదరకుండా మనోహర్ అనే జనసైనికుడి పర్యవేక్షణలో ఇతర జనసైనికులు అంతా కలిసి చంద్రగిరి నియోజకవర్గంలో, ప్రఖ్యాత శ్రీ విద్యానికేతన్ సంస్థ పరిసరాల్లో కూడా అర కిలోమీటర్ దాకా రోడ్డు వేయడం అభినందనీయం” అంటూ పోస్ట్ చేశారు. అయితే అక్కడితో ఆగకుండా, ఇందులో నీతి ఏమిటంటే, ” ఊరిని ఉద్ధరించే ముందు ఇంటి ని మరమ్మతు చేసుకోవడం ముఖ్యం మరియు ఆవశ్యం బాబు” అంటూ పోస్ట్ చేశారు నాగబాబు. అంతే కాకుండా జనసేన పార్టీ కార్యకర్తలు చంద్ర గిరి నియోజక వర్గంలో శ్రమదానం కార్యక్రమం చేయడానికి సంబంధించిన ఫోటోలు కూడా పోస్ట్ చేశాడు నాగబాబు.
అయితే ఇది కేవలం అధికార పార్టీ వత్తిడులని కాదని జనసైనికులు చేస్తున్న శ్రమ దానానికి సంబంధించిన పోస్ట్ లాగా కనిపిస్తున్నప్పటికీ, ఇందులో పరోక్షంగా మోహన్ బాబుపై నాగబాబు సెటైర్ వేసాడు అనే అభిప్రాయం వినిపిస్తోంది. నాగబాబు ప్రస్తావించిన ఆ ప్రఖ్యాత విద్యానికేతన్ సంస్థ మోహన్ బాబుది అన్న సంగతి అందరికీ తెలిసిందే. అదేవిధంగా ఇటీవలికాలంలో మూవీ ఆర్టిస్ట్ అసోసియేషన్ సంస్థలోని లోటుపాట్లను తాము సరిదిద్దుతాం అని మోహన్ బాబు కుటుంబం ప్రకటనలు చేసిన సంగతి తెలిసిందే. అయితే ఈ సందర్భంలో తమ సంస్థ బయట ఉన్న రోడ్డును మోహన్ బాబు సరిదిద్దుకోక పోతే దాన్ని కూడా జనసైనికులే మరమ్మతులు చేయించారని చెప్పడమే కాకుండా ఊరిని ఉద్ధరించే ముందు ఇంటిని మరమ్మతులు చేసుకోవాలని చెప్పడం కూడా మోహన్ బాబును ఉద్దేశించే అన్న అభిప్రాయం వినిపిస్తోంది.
మరి మోహన్ బాబు దీనిపై ఎలా స్పందిస్తారో అన్నది వేచి చూడాలి.
