నాని నుంచి ఓ సినిమా వ‌చ్చి, అదీ.. థియేట‌ర్లో రిలీజ్ అయి చాలా కాలం అయ్యింది. `వి,` `ట‌క్ జ‌గ‌దీష్‌` సినిమాలు ఓటీటీకి ప‌రిమితం అవ్వ‌డం ప‌ట్ల‌… డిస్టిబ్యూట‌ర్లు చాలా నిరాశ చెందారు. ఆ బాధ నానికి కూడా ఉంది. అందుకే ఎట్టిప‌రిస్థితుల్లోనూ ఈసారి థియేట‌ర్లోనే సినిమా విడుద‌ల చేయాల‌ని ఫిక్స‌య్యాడు. `శ్యామ్ సింగ‌రాయ్‌`ని ఇప్పుడు థియేట‌ర్ల‌లోనే విడుద‌ల చేస్తున్నాడు. ఈ సినిమాపై నాని చాలా హోప్స్ పెట్టుకున్నాడు. గ‌త రెండు సినిమాల‌తో నాని బాకీ ప‌డిపోయాడు. అది ఈ సినిమాతో వ‌డ్డీతో స‌హా తీర్చాల‌న్న‌ది త‌న ఆలోచ‌న‌. టైటిల్‌, కాస్టింగ్, నాని గెట‌ప్‌.. ఇవ‌న్నీ అంచ‌నాలు పెంచేవే. దానికి తోడు.. టీజ‌ర్ వేరే లెవ‌ల్ లో ఉండ‌డంతో… ఇప్పుడు మ‌రింత‌గా ఎక్స్‌పెక్టేష‌న్స్ పెరిగిపోయాయి. టీజ‌ర్ రిలీజ్ ఫంక్ష‌న్‌లో నాని స్పీచ్ చూస్తుంటే.. ఈసారి పెద్ద హిట్ కొట్టేట్టే క‌నిపించాడు.

నాని స్వ‌త‌హాగా త‌న సినిమా గురించి గొప్ప‌గా చెప్పుకోడు. విడుద‌ల‌కు ముందు అంచ‌నాలు పెంచ‌డం త‌న‌కీ ఇష్టం ఉండ‌దు. కానీ ఈసారి కొత్త నాని క‌నిపించాడు. `క్రిస్మ‌స్ మ‌న‌దే` అని ముందే తొడ‌గొట్టాడు. ఇదంతా సినిమా ఇచ్చిన కాన్షిడెన్సే. నాని ఇంత న‌మ్మ‌కంగా చెప్పిన ఏ సినిమా… అంచ‌నా త‌ప్ప‌లేదు. అందుకే శ్యామ్ సింగ‌రాయ్ ని మ‌రింత బ‌లంగా న‌మ్ముతున్నారు. ఏమాట‌కామాట చెప్పుకోవాలి. టీజ‌ర్ లో హిట్ ల‌క్ష‌ణాలు పుష్క‌లంగా క‌నిపిస్తున్నాయి. దానికి తోడు..`టీజ‌ర్లో చూసింది చాలా త‌క్కువ‌. అంత‌కు వంద రెట్లు సినిమాలో ఉంటుంది` అని మ‌రింత ఊరిస్తున్నాడు నాని. బ‌య‌ట కూడా ఈ సినిమాపై పాజిటీవ్ టాక్ ఉంది. ఈ సీజ‌న్‌లో టాలీవుడ్ పెద్ద హిట్ బాకీ ప‌డిపోయింది. అది శ్యాం సింగ‌రాయ్ తో అంద‌డం ఖాయ‌మ‌న్న‌ది ఇండ్ర‌స్ట్రీ వ‌ర్గాల్లో వినిపిస్తున్న‌మాట‌. నాని హిట్ కొడితే.. ఆ రేంజ్ దాదాపు 50 కోట్లు. ఇండ్ర‌స్ట్రీకే కాదు.. నానికి కూడా ఇప్పుడు ఓ హిట్ కావాలి. అది.. శ్యామ్ సింగ‌రాయ్ ఇస్తే.. గ‌త కొన్నాళ్లుగా టాలీవుడ్ కి హిట్ లేని లోటు తీర్చిన‌ట్టే.