‘పచ్చ’ పైరు మేత కొరకు రెచ్చి ఉరుకు అశ్వానికి
మాటలతో కళ్లెమేస్తె కలకాలం ఆగేనా!
అధికారపు అంచునుంచి తాయిలాలు వెల్లువెత్త
వీరి బ్రేకు పటిమ ధాటికి జారిపోకుండా మిగులునా?
జెండా దించేసినాడు.. కాడి పక్కనేసినాడు..
పనిచేస్తుందా ఇంకా… బుజ్జగింపు పర్వం !
రాజకీయ యవనికపై పవరు కుర్చీకే పెద్దపీట
దాని చుట్టూతానే.. జగతి తిరుగుతోంది సర్వం!!
తెలుగుదేశం పార్టీలో చేరిపోవడానికి సకలం సిద్ధం చేసుకున్న భూమా నాగిరెడ్డికి వైఎస్‌ జగన్మోహనరెడ్డి ప్రస్తుతానికి బ్రేకులు వేసినట్లే కనిపిస్తున్నప్పటికీ.. అలా ఎంతకాలం ఆయనను ఆపి ఉంచగలరనే విషయంలో మాత్రం ఇంకా సస్పెన్స్‌ కొనసాగుతోంది. అటువైపు తెలుగుదేశం పార్టీలో కూడా అదే భూమా ను లోకల్‌ లీడర్స్‌ ఒక పట్టాన ఆమోదించే పరిస్థితి కనిపించడం లేదు.
అయినా వైఎస్‌ జగన్‌ కాంగ్రెసును వీడి సొంత కుంపటి పెట్టుకున్నా, తనకు నచ్చిన వారినందరినీ వెంట జత చేర్చుకున్నా.. అందరూ అధికారం మీద ఆశతోనే పావులు కదిపారన్న మాట వాస్తవం. ఇలాంటి నేపథ్యంలో వర్తమానం మాత్రమే నిజం అనుకుంటూ.. అధికారం ఉన్న నీడకు చేరుకోవాలని భూమా ఆశ పడడంలో వింతేముందని అనుకుంటున్నారు జనం.
– భారతీకృష్ణ
