హైదరాబాద్: తెలుగుదేశంలోకి వైసీపీ ఎమ్మెల్యేలు ఎంతమంది వస్తారనేదానిపై మార్చి 5 లోపు స్పష్టత వస్తుందని ఏపీ వ్యవసాయ మంత్రి పత్తిపాటి పుల్లారావు చెప్పారు. జగన్ తీరుపై పార్టీలోని చాలామంది ఎమ్మెల్యేలు అసహనంతో ఉన్నారని అన్నారు. వారు జగన్‌తో కలిసి నడపటానికి గానీ, కొనసాగటానికిగానీ ఇష్టపడటంలేదని చెప్పారు. టీడీపీకి మైండ్ గేమ్ ఆడాల్సిన అవసరంలేదని చెప్పారు. చిలకలూరిపేటలో ప్రభుత్వ ఆసుపత్రిలో పల్స్ పోలియో కార్యక్రమాన్ని ప్రారంభించిన తర్వాత మంత్రి మీడియాతో మాట్లాడారు. చంద్రబాబుపై, లోకేష్‌పై సాక్షి రాస్తున్న రాతలను ప్రజలు నమ్మటంలేదని చెప్పారు. లోకేష్ నీతి, నిజాయతీ, చిత్తశుద్ధితో రాజకీయాలు చేస్తున్నారని, జగన్‌లాగా రాష్ట్రాన్ని, ప్రజలను మోసం చేసి 5 లక్షల ఎకరాలను లూటీ చేయలేదని అన్నారు.
