టీఆర్పీ రేటింగ్‌లో మాల్ ప్రాక్టీస్‌కు పాల్పడిన టీవీ9 గ్రూపు.. తమ తప్పులు ఎక్కడ బయటపడతాయో.. లేకపోతే ఇండస్ట్రీ వర్గాలు.. అసోసియేషన్లు ఎక్కడ చర్యలు తీసుకుంటాయోనని ఆందోళన చెందుతున్నట్లుగా కనిపిస్తోంది. ముందు జాగ్రత్తగా బెదిరింపు ధోరణిలో తాము బ్రాడ్ కాస్టర్స్ అసోసియేషన్ నుంచి వైదొలుగుతున్నట్లుగా ప్రకటన చేశారు. టీవీ9 గ్రూపు సీఈవో ఈ మేరకు సంఘానికి బహిరంగ లేఖ రాశారు. మామూలుగా ఏదైనా అంతర్గత ఉత్తర ప్రత్యుత్తరాల ద్వారా తేల్చుకుంటారు. ఇక్కడ టీవీ9 మాత్రం భిన్నమైన దారి ఎంచుకుంది.
న్యూస్ చానల్స్ కు రేటింగ్స్ లో అవకతవకలు జరుగుతున్నాయని న్యూస్ బ్రాడ్ కాస్టర్స్ అండ్ డిజిటల్ అసోసియేషన్ భావించడం సరి కాదని.. ఆయనంటున్నారు. ఏడాదిగా రేటింగ్స్ లేకపోవటంతో న్యూస్ చానల్స్ ఆదాయం, విశ్వసనీయత దెబ్బతిన్నాయని ఆయన ఆందోళన వ్యక్తం చేస్తున్నారు. ఇటీవల రేటింగ్స్ ను తక్షణం అమల్లోకి తేవాలని కేంద్రం ఆదేశించింది. అయితే న్యూస్ బ్రాడ్ కాస్టర్స్ అండ్ డిజిటల్ అసోసియేషన్ వ్యతిరేకించినట్లుగా తెలుస్తోంది. అక్రమాలు తేలాలని.. పట్టుబడుతోంది. ఆ తర్వాత అక్రమాలకు పాల్పడిన వారిపై చర్యలు తీసుకునే అవకాశాలు ఉన్నాయి.
అయితే ఇది టీవీ9 గ్రూపునకు నచ్చలేదు. ఇప్పటికే న్యూస్ బ్రాడ్ కాస్టర్స్ అండ్ డిజిటల్ అసోసియేషన్ టీవీ9 భరత్ వర్ష్ చేసిన రేటింగ్స్ రిగ్గింగ్ మీద స్వయంగా ఫిర్యాదు చేసిది.ఈ వైఖరికి నిరసనగా సంఘంలో ఉన్న పూర్తి స్థాయి సభ్యత్వానికి రాజీనామా చేస్తూ తమ నెట్ వర్క్ తప్పుకుంటున్నదని స్పష్టం చేశారు. తమ సభ్యత్వ రుసుములో మిగిలిన మొత్తాన్ని సంఘం నియమాలకు అనుగుణంగా వాపస్ చేయాలని కూడా టీవీ 9 గ్రూపు కోరుతోంది. ఇది టీవీ9 అనైతిక చర్యలకు పాల్పడి .. చర్యలు తీసుకుంటామోనన్న భయంతో చేస్తున్న బ్లాక్‌మెయిలింగ్‌గా మీడియా వర్గాలు భావిస్తున్నాయి.
