టీడీపీ యువ నేత నారా లోకేష్ కరోనా కారణంగా క్వారంటైన్‌లో ఉన్నారు. కానీ ఆయన పుట్టిన రోజును మాత్రం టీడీపీ కార్యకర్తలు ఘనంగా సెలబ్రేట్ చేస్తున్నారు. ఈ ఉత్సాహం గతంలో ఎప్పుడూ లేదు. ఆయన మంత్రిగా ఉన్నప్పుడు కూడా ఇలా వేడుకలు చేయలేదు. ఇప్పుడు మాత్రం ఆయనకు శుభాకాంక్షలు వెల్లువెత్తుతున్నాయి. పార్టీ కార్యకర్తలతో నేరుగా సంబంధాలు పెట్టుకుని మరీ రాజకీయం చేస్తున్న లోకేష్… ఆ ఫలితాన్ని కొంత మేర చూస్తున్నారని అనుకోవచ్చు. పార్టీ అధికారలోకి లేకపోతే.. పార్టీ ముఖ్య నేతల పుట్టిన రోజులు కూడా చాలా సింపుల్‌గా జరిగిపోతూ ఉంటాయి. అదీ ఎన్నికలు మరో రెండేళ్ల తర్వాత అయితే శుభాకాంక్షలతో సరి పెడతారు.

కానీ ఇప్పుడు లోకేష్ పుట్టిన రోజంటే టీడీపీలో ఓ ఉత్సాహం కనిపిస్తోంది. ఎంతో ఉజ్వలమైన భవిష్యత్ ఉందనే నమ్మకాన్ని ఎక్కువ మందికి లోకేష్ కల్పించగలిగారు. క్లీన్ షేవ్‌తో రాముడి మంచి బాలుడిగా కనిపించే గెటప్ .. మన రాజకీయాలకు సెట్ కాదని లోకేష్ తెలుసుకున్న తర్వాత సీన్ మారిపోయిందని అనుకోవచ్చు. గడ్డం పెంచి.. వాయిస్‌లో బేస్ మార్చి…లోకేష్ తన రాజకీయ రాతను కూడా మార్చుకున్నారని అనుకోవచ్చు. ఆ మధ్య జనంలోకి విస్తృతంగా వెళ్లినా ఇప్పుడు వ్యూహాత్మకంగా మౌనం పాటిస్తున్నారు.

కానీ తెర వెనుక మాత్రం రోజువారీ కసరత్తులు సుదీర్ఘంగా నిర్వహిస్తున్నారు. కార్యకర్తలకు ఎలాంటి చిన్న కష్టం వచ్చినా ఆదుకునేందుకు లోకేష్ పటిష్టమైన యంత్రాంగాన్ని సిద్ధం చేశారు. అదే గతంలో ఆయనకు లేని యాక్సెప్టెన్స్‌ను తీసుకు వచ్చింది. ఒక్క సారిగా ఎదిగిపోయే నేతలెవరూ సర్వైవ్ అయిన దాఖలాలు లేవు. .. కానీ ఓటమితో ప్రారంభించి.. మెల్లగా అడుగులు వేసే నేత .. సుదీర్ఘ కాలం రాజకీయాల్లో ఉంటారు. అది లోకేష్ విషయంలో నిజమయ్యే అవకాశం ఉందని టీడీపీ శ్రేణులు నమ్మకంగా ఉన్నాయి.