రేపు అంటే… మంగ‌ళ‌వారం టాలీవుడ్ లో కీల‌క‌మైన స‌మావేశం జ‌ర‌గ‌బోతోంది. ఛాంబ‌ర్ ఆధ్వ‌ర్యంలో చిరు అధ్య‌క్ష‌త‌న జ‌రిగే ఈ మీటింగ్ పై అంద‌రి దృష్టీ ప‌డింది. ఈ స‌మావేశంలో టాలీవుడ్ లోని పెద్ద త‌ల‌కాయ‌లంతా పాల్గొన‌బోతున్నారు. అందుకోసం చిరు సైతం.. ఓ అడుగు ముందుకేశారు. చిత్ర‌సీమ‌లో ప్ర‌ముఖుల్ని ఆయ‌నే స్వ‌యంగా ఫోన్ చేసి, స‌మావేశానికి రావ‌ల్సిందిగా ఆహ్వానిస్తున్నారు. అందులో భాగంగా.. బాల‌కృష్ణ, నాగార్జున, మ‌హేష్ బాబు, అల్లు అర్జున్ ల‌కు సైతం.. చిరు నుంచి ఫోన్ వెళ్లింద‌ని తెలుస్తోంది. ఈ స‌మావేశంలో నాగార్జున, దిల్ రాజు, అల్లు అర‌వింద్‌, దిల్ రాజు, అశ్వ‌నీద‌త్‌, సురేష్ బాబు, రాజ‌మౌళి, కొర‌టాల శివ, నిరంజ‌న్ రెడ్డి, ఏసియ‌న్ సునీల్ త‌దిత‌రులంతా పాల్గొన‌బోతున్నారు.
బీ,సీ సెంట‌ర్ల‌లో టికెట్ రేట్ల పెంపు, బెనిఫిట్ షోలు, 5వ ఆట‌కు అనుమ‌తి, భారీ బ‌డ్జెట్ చిత్రాల‌కు తొలి రెండు వారాల్లో టికెట్ రేట్లు పెంచుకునేలా అనుమ‌తులు తీసుకురావ‌డం… ఇలా ప‌లుకీల‌క‌మైన అంశాల‌ను ప్ర‌ధాన ఎజెండాగా తీసుకుని ఈ మీటింగ్ నిర్వ‌హించ‌బోతున్నారు. త్వ‌ర‌లోనే జగన్ మోహ‌న్ రెడ్డితో టాలీవుడ్ ప్ర‌ముఖులు స‌మావేశం కాబోతున్నార‌ని, ఆ మీటింగ్ లో ఏయే విష‌యాల‌ను ప్ర‌స్తావించాలి? అనే అంశం మీద.. ప్ర‌ధానంగా చ‌ర్చ జ‌ర‌గ‌బోతోంద‌ని తెలుస్తోంది. బాల‌య్య, నాగ్‌, మ‌హేష్… ఇలా అగ్ర హీరోలంతా క‌లిసి, ఓ నిర్ణ‌యానికి వ‌చ్చి, ఒకే గొంతు వినిపిస్తే.. ఈ స‌మ‌స్య‌లు తీర‌డం పెద్ద క‌ష్ట‌మేం కాదు.
