నాని అంటే ఏం గుర్తొస్తుంది? ఛ‌టుక్కున చెప్పండి. మొహం మీద ఓ చిన్న చిరున‌వ్వు. ప‌క్క పాపిట‌. ప‌ద్ద‌తైన లుక్‌. ప‌క్కింటి కుర్రాడు కాదు, మ‌నింట్లో కుర్రాడిగానే… ద‌ర్శ‌న‌మిస్తాడు. త‌న‌దంతా క్లాస్. ఫ్యామిలీ ఆడియ‌న్స్ కి ద‌గ్గ‌ర చేసింది ఈ విష‌యాలే. అయితే ఇప్పుడు నాని త‌న‌లోని మాస్‌ని బ‌య‌ట‌కు తీశాడు. అది మామూలు మాస్ కాదు. మ‌హా… మాస్. నానిలో ఇంత మాస్ ఉందా అని ఆశ్చ‌ర్య‌పోయేంత మాస్‌.

నాని హీరోగా ద‌స‌రా అనే సినిమా రూపుదిద్దుకుంటోంది. టైటిల్ క్లాస్‌గా ఉంటుంది గానీ, ఇందులో నాని పాత్ర ఫుల్ మాసీ. ఈ విష‌యం ముందు నుంచీ తెలుస్తూనే ఉంది. అయితే ఈరోజు.. ఈ సినిమా నుంచి నాని ఫ‌స్ట్ లుక్ విడుద‌ల చేశారు. అందులో నానిని చూస్తే.. న‌యా అవ‌తార్‌కి అచ్చ‌మైన నిద‌ర్శ‌నంలా క‌నిపిస్తోంది. ఒత్తైన జుత్తు, మాసిన గ‌డ్డం, లుంగీ, బ‌నీను, మెళ్లో చైను, నడుముకి రెండు క్వార్ట‌ర్ బాటిళ్లూ… నానిని ఎప్పుడూ ఇది వ‌ర‌కు ఇలా చూళ్లేదు. `ద‌సరా` లుక్… ఈ సినిమాపై ఫుల్ బ‌జ్‌ని క్రియేట్ చేసేలా ఉంది. నాని న‌టిస్తున్న తొలి పాన్ ఇండియా సినిమా ఇది. తెలుగు, హిందీ, కన్న‌డ‌, మ‌ల‌యాళ, త‌మిళ భాష‌ల్లో ఒకేసారి విడుద‌ల చేస్తున్నారు. శ్రీ‌కాంత్ ద‌ర్శ‌క‌త్వం వ‌హిస్తున్న ఈ చిత్రానికి సుధాకర్ చెరుకూరి నిర్మాత‌.