‘కేజీఎఫ్’ సినిమా ఒక సంచలనం. బాహుబలి తర్వాత పాన్ ఇండియాని ఆకట్టుకున్న సినిమా కేజీఎఫ్. ఇప్పుడు ఈ సినిమా పార్ట్ 2 రెడీ అయ్యింది. తాజాగా ట్రైలర్ బయటకి వచ్చింది. ”కేజీఎఫ్ లో గరుడని చంపేసిన తర్వాత ఏం జరిగింది? అనే ప్రశ్నకు .. ‘రక్తంతో రాసిన కథ ఇది. సిరాతో ముందుకు తీసుకెళ్లలేం. మళ్ళీ ముందుకు తీసుకువెళ్ళాలంటే రక్తాన్నే అడుగుతుంది” ప్రకాష్ రాజ్ పవర్ ఫుల్ డైలాగ్ తో ట్రైలర్ ఆరంభమైయింది. డైలాగ్ లో చెప్పినట్లే.. ట్రైలర్ అంతా యాక్షన్ తో నిండిపోయింది. బుల్లెట్లు, బాంబులు వర్షంలా కురిశాయి.
”వైలెన్స్.. వైలెన్స్.. వైలెన్స్ . ఐ డోంట్ లైక్. ఐ అవైడ్. బట్ వైలెన్స్ లైక్స్ మీ. ఐ కాంట్ అవైడ్” ఈ డైలాగ్ తో హీరో యష్ పవర్ ఫుల్ ఎంట్రీ ఇచ్చాడు. కేజీఫ్ పేరుతో ఒక ప్రపంచాన్ని సృష్టించాడు దర్శకుడు ప్రశాంత్ నీల్. కేజీఎఫ్ 2లో ఆ ప్రపంచం ఇంకా పెద్దదిగా చూపించాడు. సంజయ్ దత్, రవీనా టాండన్ లాంటి హేమాహేమీలు కేజీఎఫ్ 2లోకి వచ్చారు. ట్రైలర్ లో సంజయ్ భయంకరంగా కనిపించాడు. యాక్షన్ విజువల్స్, కేజీఎఫ్ ప్రపంచం, నేపధ్య సంగీతం ..ఇలా అన్నీ నెక్స్ట్ లెవల్ లో వున్నాయి. ఇక ట్రైలర్ ని ముగించిన విధానం కూడా బావుంది. కేజీఎఫ్ కథకు మూలం తల్లికి ఇచ్చిన మాట. బయటికి యాక్షన్ సినిమాలా కనిపిస్తున్న కనెక్ట్ చేసే లైన్ మాత్రం మదర్ సెంటిమెంట్. కేజీఎఫ్ 2లో కూడా తల్లి బిడ్డల ఎమోషన్ వుంది. ”ప్రపంచంలో వున్న బంగారం అంతా నీకు తెచ్చి ఇస్తానమ్మా” అని రాకీ చెప్పే డైలాగ్ తో ట్రైలర్ ని ముగించాడు దర్శకుడు.
