క్రిష్‌కి ఈమ‌ధ్య న‌వ‌ల‌ల పై దృష్టి ప‌డింది. అవార్డు న‌వ‌ల `కొండ‌పొలెం`ని ఆయ‌న సినిమాగా తీశారు. ఇప్పుడు మ‌రో న‌వ‌ల‌ని తెర‌పైకి తీసుకొచ్చే ప్రయ‌త్నం చేస్తున్నారు. అయితే ద‌ర్శ‌కుడిగా కాదు. నిర్మాత‌గా. మ‌ల్లాది వెంక‌ట‌కృష్ణ‌మూర్తి రాసిన `9 గంట‌లు` న‌వ‌ల‌ని ఆయ‌న ఇప్పుడు వెబ్ సిరీస్ గా రూపొందిస్తున్నారు. హాట్ స్టార్ కోసం. క్రిష్ ద‌గ్గ‌ర స‌హాయ‌కుడిగా ప‌నిచేసిన ఓ కుర్రాడికి ద‌ర్శ‌కత్వ బాధ్య‌త‌లు అప్ప‌గించారు. ఇప్ప‌టికే స‌గం వ‌ర్క్ పూర్త‌యింది. నిజానికి ఈ న‌వ‌ల‌ని సినిమాగా తీయాల‌న్న‌ది ఆయ‌న ఆలోచ‌న‌. `కొండ‌పొలెం` తో స‌రైన రిజ‌ల్ట్ రాక‌పోవ‌డంతో.. వెబ్ సిరీస్‌గా తీసుకొస్తున్నారిప్పుడు. క్రిష్ మ‌రికొన్ని న‌వ‌ల‌ల‌పై కూడా దృష్టి పెట్టార‌ని, అవి త్వ‌ర‌లో సినిమాలుగానో, వెబ్ సిరీస్‌లుగానో, వెబ్ మూవీలుగానో రాబోతున్నాయ‌ని తెలుస్తోంది. ప్ర‌స్తుతం `హ‌రిహ‌ర వీర‌మ‌ల్లు`తో బిజీగా ఉన్నారు క్రిష్‌. కొత్త షెడ్యూల్‌ని త్వ‌ర‌లోనే మొద‌లెట్ట‌డానికి స‌న్నాహాలు చేస్తున్నారు.