కార్తి – లోకేష్ కనగరాజ్ కాంబోలో వ‌చ్చిన ఖైది సూప‌ర్ డూప‌ర్ హిట్. అదో క‌ల్ట్ సినిమాలా మారిపోయింది. లోకేష్ పేరు.. గ‌ట్టిగా వినిపించ‌డం మొద‌లైంది ఈ సినిమా నుంచే. ఆ వెంట‌నే ఖైది 2 కూడా వ‌స్తుంద‌ని చెప్పారు. సీక్వెల్‌కి కావ‌ల్సినంత స్కోప్ ఈ క‌థ‌లో ఉంది కూడా. కానీ.. ఖైది విడుద‌లై ఇంత కాల‌మైనా ఖైది 2 గురించి ఎలాంటి స‌మాచారం లేదు. దానికీ చాలా కార‌ణాలు ఉన్నాయి. లోకేష్ వ‌రుస సినిమాల‌తో బిజీ అయిపోయాడు. త‌న క‌మిట్మెంట్స్ త‌న‌కున్నాయి. మ‌రోవైపు ఖైది 2 క‌థ పూర్తి స్థాయిలో సిద్ధం కాలేదు. సీక్వెల్ అంటే కార్తి భ‌య‌ప‌డ్డాడు. అంచ‌నాలు పెరిగిపోతాయ‌ని, వాటిని అందుకోవ‌డం మామూలు విష‌యం కాద‌ని, అంద‌కే క‌థ విష‌యంలో ఏమాత్రం అల‌స‌త్వం చూపించొద్ద‌ని లోకేష్ ని అలెర్ట్ చేశాడు కార్తి. దాంతో పాటు… విజ‌య్ తో తీసిన `మాస్ట‌ర్‌` ఏవ‌రేజ్ గా ఆడింది.అందుకే క‌థ పూర్తి స్థాయిలో, సంతృఫ్తి కరంగా వ‌చ్చేంత వ‌ర‌కూ ఖైది 2 గురించి ఆలోచించ‌లేదు.
ఇప్పుడు విక్ర‌మ్ తో మ‌రో హిట్టు కొట్టాడు లోకేష్ కనగరాజ్. విక్ర‌మ్ గొప్ప క‌థేం కాదు. చిన్న పాయింట్ అంతే. కానీ క‌మ‌ల్, ఫ‌హ‌ద్‌, విజ‌య్ సేతుప‌తి లాంటి పాత్ర‌ల‌తో… ఈ సినిమాని అభిమానుల‌కు న‌చ్చేలా, మాస్ మెచ్చేలా తీయ‌గ‌లిగాడు. దాంతో ఖైది 2 క‌థ ఎలా ఉన్నా లోకేష్ దాన్ని బాగా ప్ర‌జెంట్ చేయ‌గ‌ల‌డ‌న్న న‌మ్మ‌కం కార్తికి వ‌చ్చే ఉంటుంది. పైగా ఖైది 2కి లీడ్ సీన్స్ ఇచ్చి `ఖైది` అభిమానుల్ని ఖుషీ చేశాడు లోకేష్. అందుకే ఇప్పుడు ఖైది 2కి మార్గం సుగ‌మం అయిన‌ట్టే. ఇదే ఊపులో ఖైది 2 మొద‌లెట్టేసే అవ‌కాశాలు పుష్క‌లంగా ఉన్నాయి.
