ఆంధ్రప్రదేశ్ ఉద్యోగులకు మామూలుగా ఝులక్‌లు ఇవ్వడం లేదు. జీపీఎఫ్ సొమ్ము మాయం చేశారని గగ్గోలు పెడుతూంటే… ఇప్పుడు తమ మొత్తం జీపీఎఫ్ సొమ్ము మీద ఉన్న వడ్డీ కూడా కనిపించకుండా పోయింది. జీపీఎఫ్ అకౌంట్ స్లిప్పుల్లో కనిపిస్తున్న మొత్తం.. సెల్ ఫోన్లకు వచ్చిన మెసెజ్‌లలో లేదు. వడ్డీ కలిపి స్లిప్పులు జనరేట్ చేశారు. కానీ.. అకౌంట్ బ్యాలెన్స్ చూపించే మెసెజ్‌లో మాత్రం వడ్డీ కనిపించలేదు. అసలు నిల్వే ఉంది. దీంతో ప్రభుత్వం తమ వడ్డీ డబ్బులు వెనక్కి తీసుకుందన్న ప్రచారం జరుగుతోంది. దీంతో ఉద్యోగులు రగిలిపోతున్నారు.

తమ ఖాతాల నుంచి నగదు ఇష్టారాజ్యంగా తీసుకోవడం ఏమిటని ఓ వైపు ఉద్యోగులు మథనపడుతూంటే.. కొంచెం.. కొంచెం ఉన్నదంతా ఊడ్చే ప్రయత్నం చేస్తున్నారన్న వాదన వినిపిస్తోంది. ఇప్పటి వరకూ రాంగ్ ఎంట్రీ పేరుతో నిధులు తీసుకోగా.. ఇక ముందు.. తమ ఖాతాల్లో నగదు.. సొంత నగదేనని… భావించి ఉన్నది తీసుకున్నా ఆశ్చర్యం లేదనే వాదన వినిపిస్తోంది. ఇప్పటికే జీపీఎఫ్ సొమ్ము నుంచి విత్ డ్రా చేసుకునేందుకు ఉద్యోగులు లక్షల సంఖ్యలో దరఖాస్తులు చేసుకున్నారు. వివిధ రకాల అవసరాల కోసం ఉద్యోగులు ఈ అప్లికే,న్లు పెట్టుకున్నారు. ఇల్లు, వైద్యం, పెళ్లి వంటి కోసం పెట్టుకున్న దరఖాస్తులను ఇంత వరకూ క్లియర్ చేయడం లేదు. అసలు కారణం చెప్పడంలేదు.

ఇప్పుడు జీపీఎఫ్ ఖాతాల్లోని సొమ్ము మెల్ల మెల్లగా మాయమవుతూండటంతో మొదటికే మోసం వస్తోంది. ఉద్యోగులు ఇంకా ఎక్కువ మంది తమ జీపీఎఫ్ సొమ్ములు తిరిగి ఇవ్వాలని దరఖాస్తు పెట్టుకుంటున్నారు. అయితే ఉద్యోగ సంఘాల నేతలు మాత్రం వడ్డీ ప్రభుత్వం తీసుకోలేదని.. ఖాతాల్లోనే ఉందని ప్రభుత్వాన్ని వెనకేసుకొచ్చే ప్రయత్నం చేస్తున్నారు. స్లిప్పులకు.. మెసెజ్‌లకు తేడా లు ఎందుకు వచ్చిందో మాత్రం ప్రభుత్వ అధికారులు చెప్పిన పిట్ట కథల్ని ఉద్యోగులకు వినిపిస్తున్నారు.