ఓటీటీ అన్ని వైపుల నుంచీ.. చిత్ర‌సీమ‌ని డామినేట్ చేస్తూ పోతోంది. బ‌డా ద‌ర్శ‌కులు, హీరోలు ఓటీటీకి ఆక‌ర్షితుల‌వ్వ‌క త‌ప్ప‌డం లేదు. ఒక‌ప్పుడు ఓ వెలుగు వెలిగిన కృష్ణ‌వంశీ కూడా ఈ ట్రెండ్ ని ప‌ట్టుకోక త‌ప్ప‌డం లేదు. కృష్ణ‌వంశీ త్వ‌ర‌లో ఓ ఓటీటీ ప్రాజెక్టు చేయ‌బోతున్నాడ‌ట. ఈ ప్రాజెక్టు బ‌డ్జెట్ ఎంతో తెలుసా? దాదాపు రూ.300 కోట్లు. ఈ విష‌యాన్ని కృష్ణ‌వంశీనే చెప్పాడు.
“ఓటీటీ కోసం వ‌చ్చే యేడాది ఓ ప్రాజెక్టు చేస్తున్నా. దాని బ‌డ్జెట్ రూ.200 నుంచి రూ.300 కోట్ల వ‌ర‌కూ ఉంటుంది. ఇదో బ్లాస్ట్ లాంటి ప్రాజెక్ట్. త్వ‌ర‌లోనే ఈ వివ‌రాలు చెబుతా“ అన్నారాయ‌న. కృష్ణ‌వంశీతో.. రూ.300 కోట్ల ప్రాజెక్ట్ అంటే.. ఓర‌కంగా రిస్కే. కాక‌పోతే ఓటీటీల‌తో ఏదైనా సాధ్య‌మే. అక్క‌డ బ‌డ్జెట్ లిమిటేష‌న్లు ఉండ‌వు. ప్రాజెక్ట్‌పై న‌మ్మ‌కం ఉంటే ఎంతైనా పెట్టేస్తారు. నెట్ ఫ్లిక్స్ లాంటి సంస్థ త‌ల‌చుకొంటే.. రూ.300 కోట్లు పెద్ద లెక్కేం కాదు. కృష్ణ‌వంశీ కూడా ఈ ప్రాజెక్టుపై ధీమాగా చెబుతున్నాడంటే ఆల్రెడీ ఇది పైప్ లైన్‌లో ఉంద‌న్న‌మాటే. ఆయ‌న ద‌ర్శ‌క‌త్వం వ‌హించిన `రంగ‌మార్తండ` త్వ‌ర‌లోనే విడుద‌ల‌కు సిద్ధ‌మ‌వుతోంది. ఆ త‌ర‌వాత `అన్నం` అనే సినిమాని సెట్స్‌పైకి తీసుకెళ్తారు. మ‌నిషి త‌న స్వార్థంతో మిగిలిన జీవుల్ని ఎలా వాడుకుంటున్నాడు? వ్య‌వ‌సాయ రంగం ఎటు పోతోంది? అనే అంశంపై ఈ క‌థ ఉండ‌బోతోంద‌ని వంశీ చెబుతున్నారు.
