హిందూపురం ఎంపీ గోరంట్ల మాధవ్ వీడియో అంటూ సోషల్ మీడియాలో సర్క్యూలేట్ అవుతున్న వీడియో నిజం అయితే ఆయనకు గుణపాఠం కలిగేలా చర్యలు తీసుకుంటామని వైసీపీ ముఖ్య నేత సజ్జల రామకృష్ణారెడ్డి ప్రకటించారు. ఈ వీడియో వివాదంపై ఆయన సీఎంతో సమావేశం అయిన తర్వాత మీడియాతో మాట్లాడారు. ఈ వీడియో మార్ఫింగ్‌దని గోరంట్ల చెబుతున్నారని.. ఈ అంశంపై విచారణ జరుగుతోందన్నారు. మహిళా పక్షపాత పార్టీ గా ఇలాంటి చర్యలను తమ పార్టీ సహించబోదన్నారు.
ఉదయం నుంచి సోషల్ మీడియాలో గోరంట్ల మాధవ్ వీడియో వైరల్ అయింది. తెలుగుదేశం పార్టీ నేతలు ఎంపీపై విరుచుకుపడ్డారు. అనేక రకాల మీమ్స్‌తో ట్రోలింగ్ చేస్తున్నారు. అయితే తాను జిమ్ చేస్తున్న వీడియోను మార్పింగ్ చేశారని గోరంట్ల మాధవ్ వాదిస్తున్నారు. తెలుగుదేశం పార్టీకి చెందిన చింతకాయల విజయ్‌తో పాటు మరో ఇద్దరు కుట్ర చేశారని తాను ఏపీ పోలీసులకు ఫిర్యాదు చేసినట్లుగా చెప్పారు. చట్టపరంగా ఈ వీడియోలో కేసులు పెట్టేంత ఏమీ లేకపోయినా నైతిక పరంగా వైఎస్ఆర్‌సీపీకి ఇబ్బందికరంగా మారింది. అందుకే నిజమో కాదో తేల్చి చర్యలు తీసుకోవాలని వైఎస్ఆర్‌సీపీ పెద్దలు నిర్ణయించుకున్నట్లుగా కనిపిస్తోంది.
అయితే ఇప్పుడు గోరంట్ల మాధవ్ పై చర్యలు తీసుకుంటే.. ఇటీవల బయటపడిన మరో రెండు ఆడియోల గురించి ఎందుకు పట్టించుకోలేదన్న విమర్శలు వస్తాయి. అంబటి రాంబాబు, అవంతి శ్రీనివాస్ మహిళలతో అసభ్యంగా మాట్లాడిన ఆడియోలు వైరల్ అయ్యాయి. తమ వి కాదని అప్పట్లో వారువాదించారు. పోలీసులకు ఫిర్యాదు చేశారు. అయితే సొంత పార్టీ ముఖ్య నేతలు ఫిర్యాదు చేసిన పోలీసులు నిజాలు తేల్చలేదు. దీంతో అవి నిజమనే అభిప్రాయం ప్రజల్లో ఉంది. మరి వారిపైనా చర్యలు తీసుకుంటారా అనే ప్రశ్నలు సహజంగానే ఉదయిస్తున్నాయి.
