తెలంగాణ బీజేపీ నేతలు గంభీరమైన ప్రకటనలు చేయడంలో ఎప్పుడూ ముందుంటారు. టీఆర్ఎస్‌లో భూకంపం వస్తుందంటారు. బాంబ్ బ్లాస్ట్ జరుగుతుందంటారు. కుప్పలు తెప్పలుగా లీడర్లు బయటకు వచ్చేసి బీజేపీలోచేరుతారంటారు. కానీ వారు మాత్రం రిటైరైపోయిన రాజకీయ నేతలను ప్లీజ్.. ప్లీజ్ పార్టీలోకి రండి అని బతిమాలుకుంటున్నారు. చివరికి టీఆర్ఎస్‌లో చాన్స్ లేదని.. రాదని భావిస్తున్న నేతల్ని కూడా కన్విన్స్ చేయలేకపోతున్నారు. కానీ కాంగ్రెస్ నేతల్ని మాత్రం పట్టుబట్టి లాగేస్తున్నారు. బీజేపీ నేతల తీరు తెలంగాణలో చర్చనీయాంశమవుతోంది.

టీఆర్ఎస్ నేతలపై బీజేపీ ఆకర్ష్ ఏ మాత్రం పని చేయడం లేదు. టీఆర్ఎస్‌లో అసంతృప్తిగా ఉన్నారని ప్రచారం జరుగుతున్న తుమ్మల, పొంగులేటి, జూపల్లి, మహేందర్ రెడ్డి లాంటి మాస్ లీడర్లు సహా అనేక మందితో సంప్రదింపులు జరుపుతున్నా .. వారి మనసు మార్చలేకపోతున్నారు. కానీ కాంగ్రెస్‌లో ఉన్న బడా కాంట్రాక్టర్ల నుంచి చిన్న పాటి వ్యాపారుల వరకూ ఎవర్నీ వదిలి పెట్టకుండా లాగేందుకు ప్రయత్నిస్తున్నారు. రాజగోపాల్ రెడ్డితో పట్టుబట్టి రాజీనామా చేయించిన ఆ పార్టీ నేతలు.. మరో పది మందితో రాజీనామాలు చేయించి ఉపఎన్నికలు తెస్తామని చాలెంజ్ చేశారు. కానీ ఒక్కరు కూడా రెడీ కాలేదు.

కాంగ్రెస్ పార్టీ నేతలపై మాత్రం వరుసగా గురి పెడుతున్నారు. దాసోజు శ్రవణ్‌ను… నడ్డా, షాల సభ 21వ తేదీన ఉంటుందని తెలిసినా ముందే కండువా కప్పేశారు. రాజగోపాల్ రెడ్డి అనుచరులందరికీ ఆహ్వానం పంపుతున్నారు. కాంగ్రెస్ మాజీ ఎమ్మెల్యేలు ఎవరైనా ఖాళీగా ఉంటే వారినీ పిలుస్తున్నారు. కాంగ్రెస్ నేతల్ని చేర్చుకుని జబ్బ చరుచుకుంటున్నారు కానీ… టీఆర్ఎస్ నేతల్ని మాత్రం ఇంకా ఆకట్టుకోలేకపోతున్నారు. మునుగోడులో ఫలితం తేడా వస్తే .. ఆ కాంగ్రెస్ నేతలు కూడా జంప్ అయ్యే చాన్సే ఎక్కువ ఉంది.