వ‌శిష్ట.. ఈమ‌ధ్య కాస్త గ‌ట్టిగా వినిపిస్తున్న ద‌ర్శ‌కుడి పేరు. `బింబిసార`కు ముందు విశిష్ట‌ని ఎవ‌రూ పెద్ద‌గా ప‌ట్టించుకోలేదు. సినిమా వ‌చ్చాక చూద్దాంలే అనుకొన్నారు. తీరా బింబిసార వ‌చ్చింది. సూప‌ర్ హిట్ అయ్యింది. త‌క్కువ బ‌డ్జెట్‌లో ఓ సోషియో ఫాంట‌సీ సినిమాని భ‌లే తీశాడ్రా అనిపించింది. ఈ సినిమా ప్రీ రిలీజ్ ఫంక్ష‌న్ లో వ‌శిష్ట గురించి గొప్ప‌గా చెప్పాడు ఎన్టీఆర్. వ‌శిష్ట ప్ర‌తిభ‌కు బింబిసార కేవ‌లం ట్రైల‌ర్ మాత్ర‌మే అని, ముందు ముందు సినిమా చూపించేస్తాడ‌ని, గొప్ప ద‌ర్శ‌కుడు అవుతాడ‌ని జోస్యం చెప్పాడు ఎన్టీఆర్. `త‌మ్ముడి సినిమా క‌దా.. ఎన్టీఆర్ ఆ మాత్రం పొగ‌డ‌క త‌ప్ప‌దులే` అనుకొన్నారు జ‌నాలు. కానీ… వ‌శిష్ట ఆ మాట‌ల‌కు అర్హుడ‌ని నిరూపించుకొన్నాడు. ఈ సినిమా విడుద‌ల‌కు ముందే గీతా ఆర్ట్స్ వ‌శిష్ట‌కు అడ్వాన్స్ ఇచ్చింది. ఇప్పుడు మ‌రో ఇద్ద‌రు ముగ్గురు నిర్మాత‌లు భారీ అడ్వాన్సుల‌తో.. వ‌శిష్ట చుట్టూ తిరుగుతున్నా, `బింబిసార 2`తో పాటు గీతా ఆర్ట్స్ సినిమా అయ్యేంత వ‌ర‌కూ… అడ్వాన్సులు తీసుకోను అని తెగేసి చెబుతున్నాడ‌ట.
బింబిసార సినిమాకి వ‌శిష్ట అందుకొన్న పారితోషికం అతి స్వ‌ల్పం. ఓ ర‌కంగా చెప్పాలంటే నెల‌వారీ జీతం పుచ్చుకొన్నాడు. అయితే బింబిసార హిట్ట‌యి, భారీ లాభాలు రావ‌డంతో.. చెప్పుకోద‌గిన మొత్తంలో పారితోషికం ఇచ్చారు. ఇప్పుడు పార్ట్ 2 కి మాత్రం వ‌శిష్ట రూ.3 కోట్లు అందుకోబోతున్నాడు. గీతా ఆర్ట్స్ కూడా రూ.3 కోట్లు ఇవ్వ‌డానికి సిద్ధంగా ఉంద‌ని స‌మాచారం. ఓ కొత్త ద‌ర్శ‌కుడు ఒక్క సినిమాతోనే రూ.3 కోట్ల పారితోషికం అందుకోవ‌డం.. విశేష‌మే. ఈ ర‌కంగా ఎన్టీఆర్ న‌మ్మ‌కాన్ని.. వ‌శిష్ట నిల‌బెట్టుకొన్న‌ట్టైంది.
