ఏపీ ప్రభుత్వం తనకు చేత కావడం లేదని నేరుగానే చెబుతోంది. అయితే దానికి కరోనా కారణంగా చెబుతోంది. ఏపీ ప్రభుత్వం ప్రతి ఆర్థిక సమస్యకూ కరోనా కారణంగా చెబుతోంది. ఉద్యోగులకు సమయానికి జీతాలు ఎందుకివ్వడం లేదంటే కరోనా అంటోంది. బిల్లులు ఎందుకు చెల్లించడం లేదంటే కరోనా అంటోంది. రాష్ట్రాన్ని ఒక్క అభివృద్ధి పని ఎందుకు చేయడం లేదంటే విభజన సమస్యలు అంటున్నారు. ఇలా ప్రతీ దానికి సాకులు చెబుతూ..మది చేతకాని ప్రభుత్వమని.. చేవ చచ్చిన ప్రభుత్వమని.. ఏమీ చేయలేమని నేరుగా సర్టిఫికెట్ ఇచ్చేసుకుంటున్న వైనం ఇప్పుడు అందర్నీ నివ్వెర పరుస్తోంది.

కరోనా ఒక్క ఏపీకే వచ్చిందా ?

కరోనా అనేది ప్రపంచం అంతా వచ్చింది. ప్రజలకూ వచ్చింది. ప్రభుత్వాలకు లెక్కలకు మిక్కిలిగా అప్పులు చేసుకునే అవకాశం లభించింది. ఆ ప్రకారం తీసుకున్నారు. బయటపడ్డారు. ప్రజలు ఎన్ని కష్టాలు పడ్డారో పడిన వాళ్లకే తెలుసు. అప్పులతో కాలం గడిపేసిన ప్రభుత్వానికేం కష్టం లేదు. కానీ ఇప్పుడు సామాన్య ప్రజలకు లేని చాయిస్.. ప్రభుత్వానికి వచ్చింది. నీకేమి చేతకావడం లేదెందుకు అంటే… కరోనా కారణం అనే వెసులుబాటులభించింది. దాన్ని విపరీతంగా వాడేస్తున్నారు. ఒక్క ఏపీకేనా తెలంగాణకు లేదా… తమిళనాడుకు లేదా.. మొత్తం ప్రపంచానికి కరోనా లేదా.. అంటే.. సమాధానం ఉండదు. అందరికీ పాండమిక్ వచ్చింది .. కానీ తమ చేతకాని తనానికి అసమర్థతకు.. దాన్ని కారణంగా చూపించడం లేదు. ఒక్క ఏపీలోనే అలా చూపిస్తున్నారు.

విభజన జరిగిన ఐదేళ్లు లేని కష్టాలు ఇప్పుడెందుకు. వస్తున్నాయి ?

ఏదైనా కారణం చెబితే అతికినట్లు ఉండాలి. విభజన సమస్యల వల్లకూడా తాము అభివృద్ధి చెందలేకపోతున్నామని జీతాలివ్వలేకపోతున్నామని చెబితే.. వింతగా ఉంటుంది. ఎందుకంటే ఏపీ విడిపోయిన ఐదేళ్ల వరకూ ఓ ప్రభుత్వం నడిచింది. ఆ ప్రభుత్వం పన్నులేయలేదు. పాలన సజావుగా నడిచింది. రాష్ట్రంలో మౌలిక సదుపాయాలు పెరిగాయి. పెద్ద ఎత్తున పరిశ్రమలు కూడా వచ్చాయి. ఇప్పుడు మళ్లీ ఏపీలో దరిద్రం రాజ్యమేలడానికి విభజనే కారణం అని చెబితే.. ఎంత కామెడీగా ఉంటుంది. అయినా చెబుతున్నారు. విభజన కన్నా ఎక్కువగా తమ నిర్ణయాలు, పాలన … దారుణంగా దెబ్బకొట్టిందని కవర్ చేసుకోవడానికి విభజన కష్టాలంటున్నారు.

చేతకాని.. చేవ చచ్చిన పాలన చేస్తున్నట్లుగా నేరుగా ఒప్పుకుంటున్నారా ?

నాలుగేళ్లుగా ఒక్క పనీ చేయలేదు. పోలవరం ఆగిపోయింది. అమరావతిని చంపేశారు. రాష్ట్రంలో ఒక్క రోడ్డు బాగోలేదు. ఏపీలో అక్రమ ఇసుక, జూదం, అక్రమ మద్యం వ్యాపారాలు మినహా మరే వ్యాపారమూ సవ్యంగా సాగడం లేదు. తాగుబోతుల దగ్గర్నుంచి ఏటా రూ. 30వేల కోట్లు పిండేస్తున్నారు. కానీ ఉద్యోగులకు జీతాలివ్వడం లేదు… బిల్లులు చెల్లించడం లేదు.. ప్రతీ వర్గం రోడ్డెక్కే పరిస్థితి. వీటన్నింటినీ పరిష్కరించలేక.. కరోనా, విభజన సమస్యలు అని కారణం చెప్పి.. తమకు చేతకాదని నిరూపించుకుంటున్న ప్రభుత్వం.. నిజంగా ఏపీ ప్రజల దురదృష్టమే.