న‌రేష్ కెరీర్ ఇప్పుడు కొత్త రూటులో సాగుతోంది. త‌న ఇమేజ్‌కి భిన్న‌మైన క‌థ‌ల్ని, పాత్ర‌ల్ని ఎంచుకోవాల‌ని చూస్తున్నాడు న‌రేష్‌. అందులో భాగంగానే నాంది చేశాడు. ఆ సినిమా న‌రేష్‌కి మంచి పేరు తీసుకొచ్చింది. విజ‌య్ క‌న‌క‌మేడ‌ల ఈ చిత్రానికి ద‌ర్శ‌కుడు. ఇప్పుడు వీరిద్ద‌రి కాంబోలో… `ఉగ్రం` రూపుదిద్దుకొంటోంది. నాందిలానే ఇది కూడా విభిన్న‌మైన ప్ర‌య‌త్న‌మే అని.. ఫ‌స్ట్‌లుక్‌తోనే చెప్పేసింది చిత్ర‌బృందం. ఇప్పుడు టీజ‌ర్ విడుద‌లైంది. టీజ‌ర్ చూస్తే.. న‌రేష్‌కి ఇది క‌చ్చితంగా మ‌రో కొత్త త‌ర‌హా పాత్ర అనేది రూఢీ అయిపోయింది. ఇందులో న‌రేష్ పోలీస్ అధికారిగా క‌నిపించ‌బోతున్నాడు. నితీ, నిజాయ‌తీల‌కు క‌ట్టుబ‌డిన పోలీస్ క‌థ ఇది. త‌న వృత్తిగ‌త ప్ర‌యాణంలో ఎదురైన అనుభవాల నేప‌థ్యంలో ఈ సినిమా సాగ‌బోతోంది. ఇందులో న‌రేష్ గెట‌ప్‌, త‌న బాడీ లాంగ్వేష్ కొత్త త‌ర‌హాలో ఉండ‌బోతున్నాయి. యాక్ష‌న్‌కి పెద్ద పీట వేసిన‌ట్టు టీజ‌ర్ చూస్తే అర్థ‌మ‌వుతోంది. న‌రేష్ ఇది వ‌ర‌కు కూడా పోలీస్ పాత్ర‌లు చేశాడు. కానీ.. అవ‌న్నీ కామెడీ యాంగిల్‌లో సాగేవే. ఈసారి మాత్రం సీరియ‌స్ పోలీస్ పాత్ర‌లో ద‌ర్శ‌న‌మివ్వ‌బోతున్నాడు న‌రేష్‌. వృత్తిని దైవంగా భావించే ఓ పోలీస్ అధికారి ని ఏం చేయ‌లేని శ‌త్రువులు.. అత‌ని కుటుంబాన్ని చిన్నాభిన్నం చేస్తే.. ఆ పోలీస్ త‌న ఉగ్ర‌రూపం ఎలా చూపించాడ‌న్న‌ది సినిమా క‌థ‌. ఈ పాయింట్ తో ఇది వ‌ర‌కు చాలా క‌థ‌లొచ్చాయి. కానీ ఈ సినిమాలో న‌రేష్ న‌టించ‌డం ఓ వెరైటీ. మ‌రి ఈ ప్ర‌య‌త్నం ఎంత వ‌ర‌కూ స‌ఫ‌లీకృతం అవుతుందో తెలియాంటే ఉగ్రం విడుద‌ల‌య్యేంత వ‌ర‌కూ ఆగాల్సిందే.