హిట్, హిట్ 2 సినిమాల‌తో ఆక‌ట్టుకొన్నాడు శైలేష్ కొల‌ను. నానితో హిట్ 3 కూడా ప్లాన్ చేశాడు. అయితే ఈలోగా వెంక‌టేష్‌తో ఓ సినిమా ప‌ట్టాలెక్కించాడు. అదే… సైంధవ్. ఇటీవ‌లే ఈ సినిమా సెట్స్‌పైకి వెళ్లింది. సినిమా మొద‌లెట్ట‌క‌ముందే ఓ గ్లిమ్స్ కూడా విడుద‌ల చేశారు. ఇదో యాక్ష‌న్ థ్రిల్ల‌ర్ అనే సంగ‌తి గ్లిమ్స్ తోనే అర్థ‌మైంది. అయితే క‌థా, దాని నేప‌థ్యం గురించి చిత్ర‌బృందం ఇప్ప‌టి వ‌ర‌కూ ఎలాంటి హింట్స్ ఇవ్వ‌లేదు.
తాజా స‌మాచారం ప్ర‌కారం.. ఈ సినిమా కూడా హిట్ ఫ్రాంచైజీలానే ఉంటుందట. హిట్ 3 అనే పేరు పెట్ట‌లేదు కానీ… శైలేష్ గ‌త చిత్రాల మాదిరిగానే ఇది కూడా ఇన్వెస్టిగేష‌న్ నేప‌థ్యంలో సాగే క‌థ అని తెలుస్తోంది. వెంక‌టేష్ ఇందులో పోలీస్ ఆఫీస‌ర్‌గా న‌టించ‌బోతున్న‌ట్టు స‌మాచారం. హిట్, హిట్ 2లో హీరోలు పోలీసులే. వాళ్లూ సినిమా అంతా ఓ కేసుని ఇన్వెస్టిగేష‌న్ చేస్తూనే ఉంటారు. ఈ సినిమా కూడా అదే ఫార్మెట్‌లో న‌డుస్తుంది. కాక‌పోతే… సైంధవ్ అనే పేరు పెట్టారంతే. హిట్ ఫ్రాంచైజీకి నాని నిర్మాత. సో.. ఆ పేరు వాడుకొనే అవ‌కాశం ఇక్క‌డ లేదు కాబ‌ట్టి.. సైంధవ్ అనే కొత్త పేరు పెట్టుకొన్నారేమో..? చూస్తుంటే శైలేంద్ర పోలీస్ క‌థ‌ల‌కు బాగా ఎడిక్ట్ అయిపోయిన‌ట్టు క‌నిపిస్తోంది.
