టాలీవుడ్ లో అందరూ ఎదురు చూస్తున్న కాంబినేష‌న్… ప్ర‌భాస్ – సుకుమార్. రంగ‌స్థ‌లం, పుష్ప సినిమాల‌తో సుకుమార్ ఎక్క‌డికో వెళ్లిపోయాడు. ఇక ప్ర‌భాస్ సంగ‌తి చెప్పాల్సిన ప‌నిలేదు. త‌ను ఇప్పుడు యూనివ‌ర్స‌ల్ స్టార్. వీరిద్ద‌రి కల‌యిక‌లో ఓ సినిమా వ‌స్తే,. ఆ రేంజే వేరుగా ఉంటుంది. ప్ర‌భాస్ కి కూడా… సుకుమార్‌తో ఓ సినిమా చేయాల‌ని ఉంది. వీరిద్ద‌రి కాంబోలో ఎప్పుడో సినిమా రావాలి. కానీ.. ఎవ‌రి క‌మిట్మెంట్ల‌తో వాళ్లు బిజీగా ఉన్నారు. పుష్ప 2 త‌ర‌వాత‌… విజ‌య్ దేవ‌ర‌కొండ తో సుకుమార్ ఓ సినిమా చేయాలి. ఆ సినిమా కాస్త డౌట్ లో ప‌డింది. ఒక‌వేళ‌.. వ‌జియ్ దేవ‌ర‌కొండ సినిమా లేక‌పోతే.. సుకుమార్ – ప్ర‌భాస్‌ల కాంబో సెట్ అయిపోవ‌డం ఖాయం.

సుకుమార్ సైతం.. ప్ర‌భాస్ కోసం ఓ ప‌ర్‌ఫెక్ట్ స్టోరీ లైన్ సిద్ధం చేసిన‌ట్టు టాక్‌. ఈసారి.. సుకుమార్ ఓ పిరియాడిక‌ల్ స్టోరీ ఫిక్స్ చేశాడ‌ట‌. అది ర‌జాకారుల ఉద్య‌మ నేప‌థ్యంలో సాగే క‌థ అని తెలుస్తోంది. ఈ క‌థ ప్ర‌భాస్‌కి కూడా వినిపించాడు. పుష్ప కీ పుష్ప 2 కీ మ‌ధ్య వచ్చిన గ్యాప్ లో సుకుమార్ ఈ క‌థ‌పై వ‌ర్క్ చేసిన‌ట్టు స‌మాచారం. పుష్ప 2 అయ్యాక‌.. కొంత గ్యాప్ తీసుకొని, ఈ స్క్రిప్టుని పూర్తి స్థాయిలో సిద్ధం చేయాల‌ని సుకుమార్ భావిస్తున్నాడు. మ‌రోవైపు ప్ర‌భాస్ ఫుల్ బిజీలో ఉన్నాడు. స‌లార్ త‌ర‌వాత స్పిరిట్ సినిమా మొద‌ల‌వ్వ‌బోతోంది. ప్రాజెక్ట్ కె ఎలానూ ఉంది. ఒకేసారి రెండు మూడు సినిమాల్ని మేనేజ్ చేయ‌డం ప్ర‌భాస్ కి అల‌వాటే. అందుకే స్పిరిట్‌తో పాటుగా సుకుమార్ సినిమానీ స‌మాంత‌రంగా పూర్తి చేయాల‌ని భావిస్తున్నాడు.