2024లో చంద్రబాబు గెలిస్తే ఏపీ నెంబర్ వన్ అవుతుందని రజనీకాంత్ ప్రకటించారు. ఎన్టీఆర్ శతజయంతి ఉత్సవాలు విజయవాడలో జరిగాయి. ఈ కార్యక్రమానికి ముఖ్య అతిథిగా హాజరైన ఆయన కీలక ప్రసంగం చేశారు. ఈ సభను చూస్తూంటే రాజకీయం మాట్లాడాలని అనిపిస్తోంది కానీ.. వద్దని తన అనుభవం చెబుతోందని అన్నారు. చంద్రబాబు విజన్ ఏంటో ప్రపంచం మొత్తానికి తెలుసని సూపర్ స్టార్ రజనీకాంత్ అన్నారు. 2024 ఎన్నికల్లో చంద్రబాబు గెలిస్తే ఆంధ్రప్రదేశ్ దేశంలోనే నెంబర్ వన్ అవుతుందన్నారు. ఎన్టీఆర్ శత జయంతి వేడుకలు విజయవాడలో ప్రారంభమయ్యాయి. ప్రారంభ సభకు ముఖ్య అతిథిగా రజనీకాంత్ హాజరయ్యారు.
ఈ సందర్భంగా చంద్రబాబుతో అనుబంధం గురించి కీలక వ్యాఖ్యలు చేశారు. చంద్రబాబు తనకు 30 ఏళ్లుగా స్నేహితుడన్నారు. ఆయన హైదరాబాద్ అభివృద్ధిలో కీలక పాత్ర పోషించారని గుర్తు చేసుకున్నారు. ఐటీ గురించి ఎవరూ ఆలోచించని రోజుల్లోనే ఐటీని ప్రోత్సహించారన్నారు. ఇటవల తాను హైదరాబాద్ వెళ్లానని.. న్యూయార్క్ లో ఉన్నానా.. హైదరాబాద్‌లో ఉన్నానా అన్న అనుమానం వచ్చిందన్నారు. సైబరాాబద్‌ను చంద్రబాబు అభివృద్ధి చేశారని ప్రశంసించారు. ఎన్టీఆర్ ఆత్మ చంద్రబాబును దీవిస్తుందన్నరు. చంద్రబాబు విజన్ గురించి దేశంలో ఉన్న పెద్ద నాయకులందరికీ తెలుసన్నారు.
రజనీకాంత్ షూటింగ్ క్యాన్సిల్ చేసుకుని మరీ ఎన్టీఆర్ శతజయంతి వేడుకల్లో పాల్గొనడానికి వచ్చారని చంద్రబాబు అన్నారు. రజనీకాంత్‌కు విదేశాల్లోనూ వీరాభిమానులు ఉన్నారన్నారు. ఉన్నతమైన వ్యక్తులు ఎలా ప్రభావితం చేస్తారో రజనీకాంత్ చెప్పారన్నారు. అందరూ రజనీకాంత్ ను ఆదర్శంగా తీసుకోవాలని చంద్రబాబు పిలుపునిచ్చారు.
