తెలంగాణలో పుంంజుకోవడానికి ప్రయత్నిస్తున్న బీజేపీకి… తాజా పరిణామాలు ఏ మాత్రం ఆసక్తికరంగా లేవు. చేజేతులా పార్టీకి వచ్చిన హైప్ ను తొక్కేసుకున్న ఆ పార్టీ నేతలు ఇప్పుడు విధానాలపైనా క్లారిటీ ఉంచుకోలేకపోతున్నారు. తెలంగాణలో ధరణి ఇప్పుడు పెద్ద సమస్య. తీసేస్తామని కాంగ్రెస్ ఖరాఖండిగా చెబుతోంది. అదే సమయంలో బీఆర్ఎస్ మినహా ఇతర పార్టీలు కూడా అదే చెబుతున్నాయి. మొన్నటిదాకా బీజేపీ అదే చెప్పింది. కానీ కేసీఆర్ ధరణిని వ్యతిరేకించే వారిని బంగాళాఖాతంలో కలిపేయాలని బహిరంగసభల్లో పిలుపునిస్తున్నారు. ఈ ప్రభావం కనిపించిందేమో కానీ బండి సంజయ్ ఓ సందర్భంలో ధరణిని రద్దు చేయబోమని .. అందులో లోపాలను సవరిస్తామని ప్రకటించారు. అంతే కాదు… కేసీఆర్ పథకాలన్నింటినీ కొనసాగిస్తామన్నారు.

బండి సంజయ్ ప్రకటనతో ధరణి విషయంలో బీజేపీ స్టాండ్ మార్చుకున్నదేమో అనుకున్నారు. కానీ కొంత విరామం తర్వాత బీజేపీ అధ్యక్షుడితో నాగర్ కర్నూలులో నిర్వహించిన బహిరంగసభలో ధరణిని తీసివేయిస్తామని మరోసారి ప్రకటన చేశారు. జేపీ నడ్డా ప్రకటన చాలా మందిని ఆశ్చర్య పరిచింది. ఓ వైపు బీజేపీ తెలంంగాణ అధ్యక్షుడు ధరణిని తీసేయమని లోపాలను సవరిస్తామని చెబుతున్నారు…. మరో వైపు జాతీయ అధ్యక్షుడు తీసేస్తామని చెబుతున్నరు. ఇలా కమ్యూనికేషన్ గ్యాప్ ఎందుకు వచ్చిందన్న బిజేపీ నేతలకూ అంతు చిక్కడం లేదు.

రాష్ట్రానికి సంబంధించిన అంశాలపై ఫీడ్ బ్యాక్ ఇవ్వాల్సింది రాష్ట్ర నేతలే. విధానపరమైన నిర్ణయాలను కూడా బీజేపీ నేతలే చెప్పాలి. నడ్డాకు ఇచ్చిన స్పీచ్‌లో .ధరణి అంశాన్ని రద్దు చేసే విషయలో బండి సంజయ్ అభిప్రాయాలు తీసుకోలేదా అన్న సందేహం వస్తోంది. ఏ పార్టీలో అయినా జాతీయ అధ్యక్షుడు చెప్పిందే కరెక్ట్. కాబట్టి. .. జేపీ నడ్డా చెప్పినట్లే ధరణిని రద్దు చేసే నిర్ణయం తీసుకోవాలి. అంటే.. బండి సంజయ్ కూడా దీనికే ఫిక్సవ్వాలి. మరి తన ప్రకటన వెనక్కి తీసుకుంటారా ? ఎందుకంటే ధరణి ఓటింగ్ ప్రయారిటీ అంశాల్లో ఒకటిగా ఉండటం ఖాయంగా కనిపిస్తోంది.