ఈమ‌ధ్య యంగ్ హీరోల‌కు పోలీస్ పాత్ర‌ల‌పై మ‌క్కువ పెరుగుతోంది. అవ‌కాశం వ‌స్తే… యూనిఫామ్ వేసి, లాఠీ ప‌ట్టుకొని ప‌వ‌ర్ ఫుల్ డైలాగులు చెప్ప‌డానికి ఓకే అనేస్తున్నారంతా. తాజాగా ఈ లిస్టులో నితిన్ పేరు కూడా చేరిపోయింది. నితిన్ ఇప్ప‌టి వ‌ర‌కూ… పోలీస్ పాత్ర చేయ‌లేదు. త‌న కెరీర్‌లో తొలిసారి పోలీస్ గెట‌ప్ లో క‌నిపించ‌నున్నాడు.

వ‌క్కంతం వంశీ ద‌ర్శ‌క‌త్వంలో నితిన్ హీరోగా ఓ సినిమా రూపుదిద్దుకొంటోంది. శ్రీ‌లీల క‌థానాయిక‌. ఇందులో నితిన్‌.. పోలీస్‌గా క‌నిపిస్తాడ‌ని తెలుస్తోంది. నిజానికి ఇందులో నితిన్ ఓ జూనియ‌ర్ ఆర్టిస్టుగా ద‌ర్శ‌న‌మివ్వ‌బోతున్నాడు. జూనియ‌ర్ ఆర్టిస్ట్ అంటే లాయ‌ర్, డాక్ట‌ర్‌, ఇంజ‌నీర్.. ఇలా ర‌క‌ర‌కాల వేషాలు వేయాల్సివ‌స్తుంది. కాక‌పోతే పోలీస్ గెట‌ప్ మాత్రం అలాంటిది కాదని టాక్‌. ఈ సినిమాలో పోలీస్ పాత్ర‌కూ, అందులో భాగంగా వ‌చ్చే స‌న్నివేశాల‌కూ చాలా ప్రాధాన్యం ఉంద‌ని తెలుస్తోంది. కేవ‌లం ఈ పాత్ర కోస‌మే నితిన్ త‌న బాడీ లాంగ్వేజ్‌నీ, గెట‌ప్‌నీ మార్చేస్తున్నాడ‌ని స‌మాచారం. ఈ సినిమా కోసం ‘జూనియ‌ర్‌’, ‘షైతాన్‌’, ‘ఎగ‌స్ట్రా ఆర్డిన‌రీ మెన్‌’ అనే టైటిళ్లు ప‌రిశీలిస్తున్నారు. అయితే.. చిత్ర‌బృందం మాత్రం అధికారికంగా ప్ర‌క‌టించ‌లేదు. హారీశ్ జయ్‌రాజ్ ఈ చిత్రానికి సంగీతాన్ని అందిస్తున్నారు.