కోలీవుడ్ లో సుచి లీక్స్ ఎలా ఫేమ‌సో… టాలీవుడ్‌లో చిరు లీక్స్ కూడా అంతే ఫేమ‌స్‌. త‌న సినిమాల‌కు సంబంధించిన కొన్ని కీల‌క‌మైన విష‌యాల్ని సోష‌ల్ మీడియాలో ఓ ప్ర‌ణాళిక ప్ర‌కారం లీక్ చేస్తూ.. అభిమానుల్ని అల‌రించ‌డం చిరుకి అల‌వాటే. తాజాగా ‘భోళా శంకర్’కి సంబంధించి, ఓ ఆస‌క్తికర‌మైన విష‌యాన్ని లీక్ చేసి, మ‌రోసారి ఫ్యాన్స్‌ని ఖుషీ చేశారు.
చిరంజీవి – మెహ‌ర్ ర‌మేష్ కాంబోలో రూపుదిద్దుకొంటున్న సినిమా ఇది. ఆగ‌స్టు 11న విడుద‌ల అవుతోంది. ఈ సినిమాలో ప‌వ‌న్‌ని ఇమిటేట్ చేశారు చిరు. ‘ఖుషి’లోని ఏ మేరా జ‌హా.. పాట‌ని చిరు ఈ సినిమాలో అనుక‌రించారు. అంతే కాదు.. మెడ రుద్దుకొనే మేన‌రిజాన్నీ చిరు ఫాలో అయ్యారు. ఇందుకు సంబంధించిన వీడియోని సైతం చిరు త‌న ట్విట్ట‌ర్ వేదిక ద్వారా లీక్ చేశారు. ”ప‌వ‌న్ క‌ల్యాణ్ త‌న సినిమాలు కొన్నింటిలో న‌న్ను ఇమిటేట్ చేశాడు. ఇప్పుడు నేను త‌మ్ముడ్ని ఇమిటేట్ చేస్తున్నాను. ఇది అభిమానుల్ని అల‌రించ‌డానికి నేను చేస్తున్న స‌ర‌దా ప్ర‌య‌త్నం. ఈ సీక్రెట్ ఎవ‌రికీ చెప్పొదు…” అంటూ ట్విట్టర్‌లో ఓ వీడియో షేర్ చేశారు చిరు. ‘భోళా శంకర్`కి ఇది క‌చ్చితంగా ఎగ‌స్ట్రా మైలేజి అవుతుంద‌న‌డంలో ఎలాంటి సందేహం లేదు.
