తెలంగాణలో రాజకీయ ప్రచారం ఊపందుకుంది. బీఆర్ఎస్ అధినేత కేసీఆర్ తో పాటు కేటీఆర్, హరీష్ రావు, కవిత స్టార్ క్యాంపెయినర్లుగా విస్తృతంగా పర్యటిస్తున్నారు. సోషల్ మీడియా ద్వారా ప్రచారం చేస్తున్నారు. వీరి ప్రచార థీమ్ ఒక్కటే .. కాంగ్రెస్ పార్టీ వస్తే ప్రజలకు నరకం కనిపిస్తుదంని చెప్పడం. అది ఏ అంశమైనా సరే.. కాంగ్రెస్ వస్తే… భరించలేరని ప్రజల్ని భయపెట్టేందుకు ప్రయత్నిస్తున్నారు.

బీజేపీ అనే మాట బీఆర్ఎస్ ననాయకుల వద్ద నుంచి పెద్దగా వినిపించడం లేదు. మొత్తం కాంగ్రెస్ చుట్టూనే తిరుగుతుంది. కాంగ్రెస్ వస్తే కరెంట్ ఉండదు. కాంగ్రెస్ వస్తే రైతు బంధు ఉండదు. కాంగ్రెస్ వస్తే రోడ్లు వేయరు, కాంగ్రెస్ వస్తే సంక్షేమం ఉండదు, కాంగ్రెస్ వస్తే కబ్డాలు పెరుగుతాయి… కాంగ్రెస్ వస్తే దోచుకుంటారు. ఇలా పదే పదే చెబుతూ వస్తున్నారు. బీఆర్ఎస్ ప్రచారంలో మొదట ఇవే ఉంటున్నాయి. తర్వాత పదేళ్లలో తాము ఏం చేశామో చెప్పడానికి ప్రయత్నిస్తున్నారు. అయితే ఈ పాజిటివ్ అంశాలు ప్రజల్లోకి వెళ్లడం కష్టం కాబట్టి కాంగ్రెస్ పైనే ప్రధానంగా ఎటాక్ చేస్తున్నారు.

మరో వైపు టీ పీసీసీ చీఫ్ రేవంత్ రెడ్డిని ప్రత్యేకంగా టార్గెట్ చేశారు. ఆయన డబ్బులు వసూలు చేసి టిక్కెట్లు ఇచ్చారని…. ఆరోపణలు చేస్తున్నారు. ఆ పార్టీ నేతలే చెబుతున్నారంటూ… కేటీఆర్ తరచూ విమర్శిస్తూ ఉంటారు. కాంగ్రెస్ సమరాన్ని రేవంత్ రెడ్డి లీడ్ చేస్తున్నారు. ఆయన వ్యూహాలు బీఆర్ఎస్‌కు గట్టి సవాల్ ఇచ్చేలానే ఉన్నాయి. అందుకే రేవంత్ ను ప్రధానంగా టార్గెట్ చేస్తున్నారు.

అయితే కాంగ్రెస్ గురించి ఎక్కువగా మాట్లాడం ద్వారా ఆ పార్టీకి అదనపు ప్రయోజనం కల్పిస్తున్నారేమోనన్న వాదన కూడా కొంత మందిలో ఉంది. బీఆర్ఎస్ మేనిఫెస్టో ఎక్కడా ప్రచారంలోకి రాలేదు కానీ.. కాంగ్రెస్ గ్యారంటీలు మాత్రం వైరల్ అవుతున్నాయి.