దశాబ్దాలుగా తన సంగీతంతో అందరినీ మంత్రముగ్ధులను చేస్తున్నారు ఇసై జ్ఞాని ఇళయరాజా. 50 ఏళ్ల తన సంగీత జీవితంలో1000కు పైగా చిత్రాలకు 7000కు పైగా పాటలు, 20వేలకు పైగా సంగీత కచేరీలతో అలరిస్తున్నారు. ఇప్పటికి కూడా తనదైనశైలిలో విభిన్న చిత్రాలకు సంగీతం సమకూరుస్తూ బిజీగా వుంటున్నారు. ఇప్పుడీ మ్యూజికల్ లెజెండ్ జీవితాన్ని బయోపిక్ రూపంలో ప్రేక్షకుల ముందుకు తీసుకురానున్నారు.

ఇళయరాజా పాత్రలో కోలీవుడ్ స్టార్ ధనుష్ నటించబోతున్నారని గతంలో వార్తలు వచ్చాయి. తాజాగా ఈ చిత్రానికి పనులు ముందుకు కదులుతున్నాయి. ఈ చిత్రానికి ‘మాస్ట్రో’ అనే టైటిల్ కూడా ఫిక్స్ చేశారని తెలుస్తోంది. ఇళయరాజాని ‘మాస్ట్రో’ అని సంభోదిస్తుంటారు. ఇప్పుడు అదే టైటిల్ బయోపిక్ కి పెడుతున్నారు.

‘కనెక్ట్ మీడియా’ సంస్థ ఈ చిత్రాన్ని నిర్మించనుంది. ఇళయరాజా కుమారుడు యువన్ శంకర్ రాజా కూడా ఈ విషయాన్ని ధృవీకరించారని కోలీవుడ్ మీడియాలో వార్తలు వస్తున్నాయి. ప్రస్తుతం ధనుష్ కెప్టెన్ మిల్లర్ తో పాటు శేఖర్ కమ్ముల సినిమా చేస్తున్నారు. దిని తర్వాత ఇళయరాజా బయోపిక్ మొదలయ్యే అవకాశాలు వున్నాయి.