తెలంగాణలో బీజేపీ గెలుపు కోసం పూర్తిగా కులాల లెక్కల్నే చూసుకుంటోంది. ఇందు కోసం మూడు సామాజికవర్గాలపై పెద్ద ప్లాన్ వేసింది. దాన్ని నేరుగా ప్రధానమంత్రి నరేంద్రమోదీ అమలు చేస్తున్నారు. బీసీ ముఖ్యమంత్రి నినాదం… ఎస్సీ వర్గీకరణ హామీ… పవన్ కల్యాణ్ సాయంతో కాపు ఓట్లు.. ఈ మూడు కలిస్తే గెలిచేస్తామని బీజేపీ ఆశలు పెట్టుకుంది. ఆ ప్రకారమే పని చేసుకుంటూ పోతోంది. బీజేపీ గెలిస్తే బీసీ సీఎం వస్తారని బీజేపీ ఇప్పటికే ఉద్ధృతంగా ప్రచారం చేస్తోంది. అది ప్రజల్లోకి వెళ్తుందా లేదా అన్న సంగతి పక్కన పెడితే… తెలంగాణలో మెజార్టీ వర్గం బీసీలు. వారికి సీఎం పదవి ఇస్తామని చెబుతున్నారు. బండి సంజయ్, ఈటల వంటి వారు ఈ పదవి కోసం ఇప్పటి నుంచే పోటీ పడుతున్నారు.
అయితే అందరు బీసీలు ఏకపక్షంగా మద్దతివ్వరు కాబట్టి… మరో రెండు కాంబినేషన్లు సెట్ చేసుకున్నారు. అందులో మాదిగ వర్గం ఒకటి. ఎస్సీ వర్గీకరణకు కమిటీ వేస్తామని చెప్పేందుకు మోదీ భారీ బహిరంగసభ ఏర్పాటు చేసుకున్నారు. మందకృష్ణ ముందుండి నడిపించారు. ప్రధాని వంటి వ్యక్తి పిలిచి సభ ఏర్పాటు చేయమంటే మందకష్ణ వద్దనుకుంటారా ?. సభలో మందకృష్ణను దగ్గరకు తీసుకుని ఓదార్చడం దగ్గర్నుంచి .,. ఈ విషయంలో తమ నాయకుడు మందకృష్ణేనని చెప్పడం వరకూ ఆ వర్గాన్ని మోదీ ఎలా ఆకట్టుకోవాలో అలా ఆకట్టుకోవడానికి ప్రయత్నించారు.
ఇటీవల ఎల్బీ స్టేడియంలో జరిగిన బీసీ ఆత్మగౌరవసభలో పవన్ కల్యాణ్ కు కూడా మోదీ అదే తరహా ట్రీట్ మెంట్ ఇచ్చారు. ఆప్యాయంగా పలకరించారు. తన వెనుక పవన్ ఉన్నారని గొప్పగా చెప్పుకున్నారు. మున్నూరు కాపు ఓట్లపై మోదీ కన్నేసి ఇలా చేశారని ప్రత్యేకంగా చెప్పాల్సిన పని లేదు. అయితే తెలంగాణలో … అన్నీ వదిలేసి ప్రజలు కులాల వెంటపడి… మూడు కాంబినేషన్లు కలిపింది కదా అని బీజేపీకి ఓటేస్తారా అన్నదే ఇక్కడ సస్పెన్స్.
