ఎమ్మెల్యేలు పార్టీలు ఫిరాయించడానికి సంబంధించి స్పీకరు నిర్ణయం తీసుకోవడానికి కూడా ఒక నిర్దిష్టమైన ప్రక్రియ ఉంటుంది. నిర్ణయం అనేది అంతిమంగా ఆయన విచక్షణకు లోబడే ఉంటుందనడంలో ఎలాంటి సందేహం లేదు. అయితే చర్య తీసుకోవడానికి సంబంధించిన పద్ధతిని ఆయన అనుసరించాల్సిందే. అందుకే తెలంగాణలో కూడా తెదేపా ఫిర్యాదులు చేసినా.. నిర్ణయం రాకుండా ఏళ్లూ పూళ్లూ గడచిపోతూనే ఉన్నాయి.

ఇలాంటి నేపథ్యంలో ఇవాళ ఏపీ లో వైకాపా నాయకులు కూడా స్పీకరును కలిసి.. పార్టీ ఫిరాయించిన తమ 8 మంది ఎమ్మెల్యేలను అనర్హులు చేయాలంటూ ఫిర్యాదు చేశారు. 8 మంది తెదేపాలో చేరారు గనుక.. వారిని తక్షణం వేటు వేసేయాలన్నది వారి డిమాండు. అందులో సహేతుకత కూడా ఉంది.

అయితే ఈ సందర్భంగా పార్టీ ఎమ్మెల్యేల తరఫున జ్యోతుల నెహ్రూ మాట్లాడిన మాటలు మాత్రం ప్రత్యేకంగా గమనించాలి. తాము స్పీకరుకు ఫిర్యాదుచేసిన సంగతిని వెల్లడిస్తూనే.. స్పీకరు ముందరిక కాళ్లకు బంధాలు కూడా వేశారు.

‘ఎమ్మెల్యే చర్యలతో ప్రజాస్వామ్యాన్ని మీరే రక్షించాలి’ అంటూ వారు కోరారు. స్పీకరు ప్రజాస్వామ్యాన్ని రక్షించడం సంగతి తర్వాత.. ”ఆయన నిష్పక్షపాతంగానే వ్యవహరిస్తారని అనుకుంటున్నాం” అంటూ జ్యోతుల నెహ్రూ సెలవిచ్చారు. ఇక్కడ టెక్నికల్‌గా నెహ్రూ వాడిన పదాలను గమనించాలి. స్పీకరు న్యాయమైన, ధర్మమైన, రాజ్యాంగబద్ధమైన నిర్ణయం తీసుకుంటారు అని భావిస్తున్నాం అని చెప్పిఉంటే అదొక తీరుగా ఉండేది. అయితే ఆయన అందుకు భిన్నంగా.. స్పీకరు నిష్పక్షపాతంగా నిర్ణయం తీసుకుంటున్నారని భావిస్తున్నాం అని చెప్పారు. ఇండైరక్టుగా తాము కోరినట్లు నిర్ణయం తీసుకోకపోతే.. స్పీకరు పక్షపాతం ప్రదర్శించినట్లే.. అని నెహ్రూ ఇప్పటినుంచే జనం మెదళ్లలోకి ఇంజెక్ట్‌ చేస్తున్నారని అనిపిస్తోంది.

అంటే స్పీకరు నిర్ణయం తీసుకోకుంటే ఎలా తిట్టాలని, ఎలా పోరాటం చేయాలని అనుకుంటున్నారో.. ఇప్పటినుంచే వైకాపా ప్రిపేర్‌ అయిపోతున్నట్లుగా కనిపిస్తోంది.