తమ అభిమాన హీరోల సినిమాల కోసం ఎదురుచూస్తుంటారు ఫ్యాన్స్. ప్రతి అప్డేట్ ని గొప్పగా సెలబ్రేట్ చేసుకుంటారు. అటు హీరోలు కూడా అభిమానులు, ప్రేక్షకులని అలరించడానికే ప్రయత్నిస్తుంటారు. ఏడాదికి ఒక్క సినిమాతో నైనా పలకరించాలని చూస్తుంటారు. కానీ కొన్నిసార్లు కుదరుదు. కథ కుదరకపోవడం, ప్రొడక్షన్ జాప్యం.. ఇలా పలు కారణాలతో గ్యాప్ వచ్చేస్తుంది. 2023లో అలా ఖాతా తెరువని స్టార్స్ వివరాల్లోకి వెళితే..
సినిమాల విషయంలో మహేష్ బాబు ప్లానింగ్ బావుటుంది. ఏడాదికి ఒక్క సినిమా అయినా ఇవ్వాలనే తపనతో వుంటారు మహేష్. కానీ ఈ ఏడాది మహేష్ బాబు డైరీ ఖాళీ అయిపోయింది. నిజానికి త్రివిక్రమ్ తో చేస్తున్న గుంటూరు కారం ఈ యేడాదే రావాల్సింది. ఈ సినిమా షూటింగ్ మొదలుపెట్టి చాలా కాలమైయింది. అయితే కొంత షూటింగ్ జరిగిన తర్వాత కథలో ఏవో మార్పులు జరిగాయని వార్తలు వచ్చాయి. కొంత విరామం తీసుకొని మళ్ళీ షూటింగ్ కొనసాగించారు. ఇప్పుడు ఈ సినిమా 2024 సంక్రాంతి విడుదలౌతుంది. మహేష్ బాబు, త్రివిక్రమ్ హ్యాట్రిక్ కాంబినేషన్ లో వస్తున్న ఈ సినిమాపై మంచి అంచనాలు వున్నాయి.
ఆర్ఆర్ఆర్ తో గ్లోబల్ ఫేం సాధించారు ఎన్టీఆర్. ఈ సినిమా తర్వాత మళ్ళీ ఆ స్థాయిలో సినిమా చేయడానికి కొరటాల శివతో జతకట్టారు జూనియర్. ఈ ఏడాది అంతా ప్రీప్రొడక్షన్, ప్రొడక్షన్ కే కేటాయించారు. ‘దేవర’ రెండు భాగాలుగా ప్రేక్షకుల ముందుకు రాబోతుంది. ఈ సినిమాతో టాలీవుడ్ కి జాన్వి కపూర్ పరిచయమౌతుంది. ఆర్ఆర్ఆర్ తర్వాత ఎన్టీఆర్ చేస్తున్న ఈ చిత్రంపై భారీ అంచనాలు వున్నాయి. ప్రస్తుతం షూటింగ్ జరుగుతోంది. వేసవిలో సినిమా విడుదల చేయడానికి సన్నాహాలు జరుగుతున్నాయి.
రామ్ చరణ్ పరిస్థితి కూడా ఇంచుమించు ఇలానే వుంది. ఆర్ఆర్ఆర్ తర్వాత శంకర్ దర్శకత్వంలో గేమ్ ఛేంజర్ సినిమాని సెట్స్ పైకి తీసుకెళ్ళారు. శంకర్ సినిమా అంటే మాములుగానే చాలా సమయం తీసుకుంటుంది. పైగా ఆయన కమల్ హసన్ ఇండియన్ 2 తో పాటుగా ఈ సినిమాని చేస్తున్నారు. నిజానికి ఈ సినిమా 2023 కోసమే అనుకున్నారు. కానీ అనుకున్న ప్లానింగ్ ప్రకారం షూటింగ్ జరగలేదు. దీంతో రామ్ చరణ్ ఈ ఏడాది గ్యాప్ వచ్చేసింది.
ఈ ఏడాది అల్లు అర్జున్ కూడా కనిపించలేదు. కానీ బన్నీ ఫ్యాన్స్ మాత్రం ఒక విషయంలో పండగ చేసుకున్నారు. సుదీర్గ తెలుగు చలన చిత్ర పరిశ్రమలో జాతీయ అవార్డ్ అందుకున్న ఏకైక తెలుగు హీరోగా చరిత్ర సృష్టించారు అల్లు అర్జున్. ఈ యేడాదే బన్నీకి నేషనల్ అవార్డ్ వరించింది. పుష్ప సినిమాకి గాను ఉత్తమ నటుడిగా జాతీయ అవార్డు అందుకొని యావత్ తెలుగు సినిమా పరిశ్రమ గర్వపడేలా చేశారు బన్నీ. ప్రస్తుతం పుష్ప 2 షూటింగ్ శరవేగంగా జరుగుతోంది. 2024 ఆగస్ట్ ఈ సినిమా ప్రేక్షకుల ముందుకు వస్తోంది.
చిరంజీవి, బాలకృష్ణ లాంటి సీనియర్ హీరోలు రెండేసి సినిమాలతో అలరించారు కానీ మరో ఇద్దరు సీనియర్లు నాగార్జున, వెంకటేష్ మాత్రం కొత్త సినిమాని తీసుకురాలేకపోయారు. వెంకటేష్ సల్మాన్ ఖాన్ తో ఓ హిందీ సినిమాలో స్క్రీన్ పంచుకున్నారు. అయితే ఆయన నుంచి తెలుగు సినిమా రాలేదు. అన్నట్టు ఈ ఏడాది ‘రానా నాయుడు’ వెబ్ సిరిస్ తో ఓటీటీ ఎంట్రీ ఇచ్చారు వెంకీ. నాగార్జున నుంచి కూడా సినిమా రాలేదు. బిగ్ సీజన్ 7 హోస్ట్ గా బిజీ అయ్యారు నాగ్. అయితే ఇప్పుడీ ఇద్దరూ సంక్రాంతి బరిలో దిగుతున్నారు. నాగార్జున ‘నా సామిరంగ’, వెంకటేష్ సైంధవ్ పండక్కి ప్రేక్షకుల ముందుకు వస్తున్నాయి.
అలాగే రానా, శర్వానంద్, మంచు విష్ణు లకు కూడా 2023 గ్యాప్ వచ్చింది. రానా నుంచి హిరణ్య కశ్యప, రాక్షస రాజు సినిమా ప్రకటనలు వచ్చాయి. శర్వానంద్, శ్రీరామ్ ఆదిత్యతో ఓ సినిమా చేస్తున్నాడు. మంచు విష్ణు భక్తకన్నప్పతో బిజీగా వున్నారు. ఇవన్నీ 2024లో పలకరించే చిత్రాలే.
