హైదరాబాద్‌లో సన్బర్న్ ఫెస్టివల్‌కు పోలీసులు అనుమతి నిరాకరించారు. అలాంటి వేడుకలకు అనుమతులు వద్దని సీఎం స్పష్టంగా చెప్పడంతో ఈ మేరకు ఆదేశాలు ఇచ్చారు. అయితే సన్ బర్న్ నిర్వాహకులు బరితెగింపుగా వ్యవహరించారు. ఎలాంటి అనుమతులు లేకుండా టిక్కెట్లు అమ్మకాలు ప్రారంభించారు. దీంతో బలమైన పవర్ లాబీ పని చేస్తోందని చాలా మందికి అర్థం అయింది. విషయం సీపీ దృష్టికి వెళ్లడంతో చివరికి టిక్కెట్లు బుక్ చేస్తున్న బుక్ మై షోపై కేసులు పెట్టారు.
దాంతో టిక్కెట్ల బుకింగ్ ఆపేశారు. ఈ సన్ బర్న్ ఫెస్టివల్ ను తెలంగాణ ఏర్పడిన మొదటి ఏడాదే కేటీఆర్ తీసుకొచ్చారు. హైదరాబాద్ లో లీజర్ ఫెస్టివల్స్ పెరగాల్సి ఉందని.. అందుకే తీసుకొచ్చామని .. హావ్ ఏ బ్లాస్ట్ అని 2014లోనే ట్వీట్ చేశారు. అప్పట్నుంచి ప్రతీ ఏడాది జరుగుతూనే ఉన్నాయి. అయితే ఈ సన్ బర్న్ ఫెస్టివల్ అనేది మద్యం, డ్రగ్స్, విచ్చలవిడి పార్టీ అన్న ఆరోపణలు చాలా కాలంగా ఉన్నాయి. ఒక్క హైదరాబాద్ లోనే కాదు.. ఇతర రాష్ట్రాల్లోనూ దీనిపై వివాదాలున్నాయి. నిర్వహించేది సన్ బర్న్ సంస్థ అయినా హైదరాబాద్ లో ఫ్రాంచైజీ తీసుకుని నిర్వహించేది కేటీఆర్ బంధువులేనని ప్రతిపక్షంలో ఉన్నప్పుడు కాంగ్రెస్ నేతలు ఆరోపణలు చేశారు.
కేటీఆర్ ..తన బావమరిది పేరుతో పబ్‌ల బిజినెస్ చేస్తూంటారని..ఆయన పేరు మీదనే సన్ బర్న్ నిర్వహిస్తున్నారన్న ఆరోపణలు చేశారు. రేవంత్ రెడ్డి కూడా విమర్శలు గుప్పించారు. ఇప్పుడు అధికారంలోకి వచ్చినందున గతంలో తాము విమర్శించిన ఫెస్టివల్స్ ను ఇప్పుడు అనుమతించడం ఎందుకని ప్రభుత్వం భావిస్తున్నట్లుగా తెలుస్తోంది. డ్రగ్స్ మీద యుద్దం ప్రకటించిన ముఖ్యమంత్రి రేవంత్ హైదరాబాద్ లో ఇకపై ఇలాంటి వాటికి అనుమతి లేదంటూ చాలా స్పష్టంగా ప్రకటించారు.
