చంద్రబాబు స్కిల్ డెవలప్మెంట్ కేసులో 17A సుప్రీం కోర్టు భిన్నాభిప్రాయాలు పై సీపీఐ పార్టీ జాతీయ కార్యదర్శి నారాయణ సంచలన వ్యాఖ్యలు చేశారు. చంద్రబాబు నాయుడు పై ఉన్న స్కిల్ డెవలప్మెంట్ కేసులో 17A వర్తిస్తాదా, వర్తించదా అనే అంశంపై ఈ రోజు తీర్పు రావాల్సి ఉన్నా.. సుప్రీం కోర్టులోనే త్రిసభ్య న్యాయమూర్తులలో భిన్నభిప్రాయాలు వెలువడిందని, ముమ్మాటికి ఇందులో రాజకీయ జోక్యం చోటుచేసుకుందని వ్యాఖ్యలు చేశారు.
బీజేపీకి ఎవరైతే అనుకూలంగా ఉన్నారో వాళ్లపై కేసులు ఉండవని.. బీజేపీకి వ్యతిరేకంగా ఉన్నటువంటి రాజకీయ పార్టీలు, ఆ పార్టీ నాయకులు మీద ఎప్పుడు గానీ కత్తులు వేలాడుతూనే ఉంటుందని ఆరోపించారు. ఆ తరహాలోనే ఈ కేసులో కూడా 17A వర్తిస్తదా, వర్తించదా అనే అంశం వేలాడుతూనే ఉంటుందే తప్ప ఒక కొలిక్కి వచ్చేదానికి అవకాశం లేదని తెలిపారు. ఇందులో న్యాయ వ్యవస్థ కూడా ఒక రకమైన గేమ్ ను ఆడుతుందని తాను అభిప్రాయపడుతున్నట్లు పేర్కొన్నారు. ఇది ఒక రకమైన రాజకీయ బెదిరింపు, ఒత్తిడి తప్ప మరొకటి లేదని ఆరోపించారు.
ఏపీలో రాజకీయ పొత్తుల అంశం తేలడం లేదు. టీడీపీ, జనసేన కూటమిలో బీజేపీ ఉంటుందని ప్రచారం జరుగుతోంది. జనసేన పార్టీతో తాము కలిసే ఉన్నామని బీజేపీ చెబుతోంది. కానీ టీడీపీ మాత్రం పొత్తులకు వెళ్లడం లేదు. పొత్తులు కావాలంటే తమ పార్టీని అడగాలని టీడీపీకి బీజేపీ నేతలు సూచిస్తున్నారు. అయితే ఈ విషయంలో మాత్రం టీడీపీ పెద్దగా ఆసక్తి చూపించడం లేదు. జనసేనతో ఎన్నికలకు వెళ్తే చాలన్నట్లుగా ఉంది.
