సంక్రాంతి అయిపోయింది. ఈ పండ‌గ విజేత ఎవ‌రు? ఏ సినిమాకి ఎన్ని వ‌సూళ్లు వ‌చ్చాయి? అనే లెక్క‌లు కూడా అయిపోయాయి. అయితే ఈ సంబ‌రాలు మాత్రం ఫిబ్ర‌వ‌రిలోనూ కొన‌సాగ‌బోతున్నాయి. సాధార‌ణంగా పండ‌గ సినిమాల త‌ర‌వాత‌… థియేట‌ర్ల‌లో మళ్లీ సంద‌డి మొద‌లవ్వ‌డానికి కొంత స‌మ‌యం ప‌డుతుంది. అయితే ఈసారి మాత్రం గ్యాప్ లేదు. ఫిబ్ర‌వ‌రిలో వ‌రుస సినిమాల‌తో బాక్సాఫీసు హోరెత్త‌బోతోంది.

వ‌చ్చే వారం నుంచి ‘మినీ సంక్రాంతి’ మొద‌లు కానుంది. అనువాద చిత్రాలు కెప్టెన్ మిల్ల‌ర్‌, అల‌యాన్ వ‌రుస‌గా ప్రేక్ష‌కుల ముందుకు వ‌స్తున్నాయి. ఫిబ్ర‌వ‌రిలో ‘ఈగ‌ల్‌’, ‘ఆప‌రేష‌న్ వాలైంటేన్‌’, ‘ఊరి పేరు భైర‌వ‌కోన‌’, ‘యాత్ర 2’, ‘లాల్ స‌లామ్‌’, ‘అంబాజీపేట మ్యారేజ్ బ్యాండ్‌’, ‘భీమా’ ఇవ‌న్నీ విడుద‌ల‌కు సిద్ధ‌మ‌య్యాయి. ఫిబ్ర‌వ‌రి 9న బాక్సాఫీసు ద‌గ్గ‌ర పోటీ ఎక్కువ‌గానే ఉంది. ఆ రోజున నాలుగు సినిమాలు వ‌స్తున్నాయి. అయితే ‘ఈగ‌ల్‌’ మాత్రం సోలో రిలీజ్ కోసం ప‌ట్టుప‌డుతోంది. సంక్రాంతి బ‌రి నుంచి త‌ప్పుకొన్న ‘ఈగ‌ల్’ కోసం ఫిబ్ర‌వ‌రి 9న సోలో రిలీజ్ అవ‌కాశం వ‌స్తే… ‘యాత్ర 2’, ‘భైర‌వ‌కోన‌’ వెన‌క్కి వెళ్లినా.. ఆ రెండు సినిమాలూ ఫిబ్ర‌వ‌రిలోనే వ‌స్తాయి. మొత్తానికి ఫిబ్ర‌వ‌రిలో ప్ర‌తీవారం క‌నీసం రెండు సినిమాలు బాక్సాఫీసు ద‌గ్గ‌ర సంద‌డి చేయ‌డం ఖాయం.