2025 సంక్రాంతికి థియేట‌ర్ల‌లో మెగా హంగామా క‌నిపించ‌నుంది. చిరంజీవి తాజా చిత్రం `విశ్వంభ‌ర` సంక్రాంతికి రిలీజ్ చేస్తామ‌ని చిత్ర బృందం ప్ర‌క‌టించిన సంగ‌తి తెలిసిందే. ఇప్పుడు రిలీజ్ డేట్ కూడా ఫిక్స్ చేశారు. జ‌న‌వ‌రి 10న ఈ చిత్రాన్ని ప్రేక్ష‌కుల ముందుకు తీసుకొస్తామ‌ని చిత్ర‌బృందం అధికారికంగా ధృవీక‌రించింది. ఈరోజు నుంచే… చిరు కూడా సెట్లో అడుగు పెట్ట‌బోతున్నాడు. హైద‌రాబాద్ లో `విశ్వంభ‌ర` కోసం ఓ ప్ర‌త్యేక‌మైన సెట్ తీర్చిదిద్దారు. అక్క‌డ చిరుపై ఓ ఫైట్ సీక్వెన్స్ తెర‌కెక్కించ‌నున్నారు. రామ్ ల‌క్ష్మ‌ణ్ వీటికి నేతృత్వం వ‌హిస్తారు.
ఈ చిత్రంలో త్రిష క‌థానాయిక‌గా న‌టిస్తోంది. ఈ షెడ్యూల్ లోప‌నే త్రిష కూడా సెట్లో అడుగుపెట్టే అవ‌కాశాలు ఉన్నాయి. భీమ‌వ‌రం దొర‌బాబుగా చిరు పాత్ర వింటేజ్ లుక్ లో సాగ‌బోతోంద‌ని, ఆయ‌న ఐదుగురు చెల్లాయిల‌కు అన్న‌గా క‌నిపించ‌బోతున్నాడ‌ని స‌మాచారం. కీర‌వాణి సంగీతాన్ని స‌మ‌కూరుస్తున్నారు. దాదాపు రూ.150 కోట్ల బ‌డ్జెట్ తో ఈ చిత్రాన్ని యూవీ క్రియేష‌న్స్ నిర్మిస్తోంది. ఇటీవ‌ల ఓవ‌ర్సీస్ డీల్ కూడా క్లోజ్ అయ్యింది. రూ.18 కోట్ల‌కు ఓవ‌ర్సీస్ రైట్స్ అమ్ముడ‌య్యాయి.
