అప్పుడెప్పుడో ‘స్టాలిన్‌’లో చిరంజీవి – త్రిష జంట‌గా క‌నిపించారు. మ‌ళ్లీ ఇన్నాళ్ల‌కు ఈ జోడీని వెండి తెర‌పై చూసే ఛాన్స్ ద‌క్కింది. ‘విశ్వంభ‌ర’తో. చిరంజీవి క‌థానాయ‌కుడిగా వ‌శిష్ట ద‌ర్శ‌క‌త్వంలో రూపొందుతున్న చిత్ర‌మిది. ఇందులో త్రిష హీరోయిన్. ఇప్పుడు ఆమె సెట్లోకి కూడా అడుగుపెట్టింది. హైద‌రాబాద్ లో `విశ్వంభ‌ర` షూటింగ్ జ‌రుగుతోంది. మొన్నే చిరంజీవి షూటింగ్ లో జాయిన్ అయ్యారు. ఇప్పుడు త్రిష వంతు వ‌చ్చింది. హైద‌రాబాద్ షెడ్యూల్ లో త్రిష.. ఎంట్రీ ఇచ్చింది. ఈ సంద‌ర్భంగా త్రిష‌కు స్వాగ‌తం చెబుతూ చిరంజీవి ట్విట్ట‌ర్ లో ఓ పోస్ట్ పెట్టారు.
ఇదో సోషియో ఫాంట‌సీ క‌థ. భీమ‌వ‌రం దొర‌బాబుగా చిరంజీవి న‌టిస్తున్నారు. ఆయ‌న‌కు ఐదుగురు అక్క‌లు, చెల్లెమ్మ‌లు. ఆ పాత్ర‌ల కోసం పేరున్న క‌థానాయిక‌ల్ని తీసుకొనే ప్ర‌య‌త్నం జ‌రుగుతోంది. భీమ‌వ‌రం ప‌రిసర ప్రాంతాల్లో ఓ కీల‌క షెడ్యూల్ చిత్రీక‌రిస్తారు. కీర‌వాణి ఈ చిత్రానికి సంగీతాన్ని అందిస్తున్నారు. ఇప్ప‌టికే 3 పాట‌ల్ని రికార్డ్ చేశారు. 2025 సంక్రాంతి కానుక‌గా జ‌న‌వ‌రి 10న ఈ చిత్రాన్ని విడుద‌ల చేయ‌బోతున్నారు.
