ఇటీవ‌ల వ‌చ్చిన కుర్ర హీరోయిన్ల‌లో మీనాక్షి చౌద‌రికి మంచి అవ‌కాశాలు వ‌స్తున్నాయి. `గుంటూరు కారం`లో మహేష్‌తో క‌లిసి న‌టించింది కానీ, ఆ పాత్ర, సినిమా స‌రైన సంతృప్తి ఇవ్వ‌లేక‌పోయాయి. అయితే ఇప్పుడు ఓ గోల్డెన్ ఛాన్స్ అందుకొన్న‌ట్టు స‌మాచారం. చిరంజీవితో మీనాక్షి జోడీగా కనిపించబోతోందని టీ టౌన్ టాక్‌.
చిరంజీవి క‌థానాయ‌కుడిగా ‘విశ్వంభ‌ర’ అనే చిత్రం రూపుదిద్దుకొంటోంది. ఇందులో త్రిష క‌థానాయిక. ఈ రోజే త్రిష సెట్లో అడుగు పెట్టింది. త్రిష‌తో పాటు మ‌రో ఇద్ద‌రు ముగ్గురు క‌థానాయిక‌లు ఈ సినిమాలో క‌నిపించ‌నున్నారు. అందులో ఓ క‌థానాయిక‌గా మీనాక్షిని ఎంచుకొన్న‌ట్టు తెలుస్తోంది. సోషియో ఫాంట‌సీ నేప‌థ్యంలో సాగే క‌థ ఇది. ఈ సినిమా కోసం ఓ స‌రికొత్త లోకాన్ని సృష్టించ‌బోతున్నారు. ఆలోకంలో దేవ‌క‌న్య‌గా మీనాక్షి కనిపించబోతోందని టాక్‌. యూవీ క్రియేష‌న్స్ దాదాపు రూ.150 కోట్ల భారీ వ్య‌యంతో ఈ చిత్రాన్ని రూపొందిస్తోంది. ఓవర్సీస్ రైట్స్ దాదాపు రూ.18 కోట్ల‌కు అమ్ముడ‌య్యాయి. 2025 సంక్రాంతికి ఈ చిత్రాన్ని ప్రేక్ష‌కుల ముందుకు తీసుకొస్తారు.
