సిద్దు జొన్న‌ల‌గ‌డ్డ క‌థానాయ‌కుడిగా బొమ్మ‌రిల్లు భాస్క‌ర్ ద‌ర్శ‌క‌త్వంలో ఓ చిత్రం రూపుదిద్దుకొంటున్న సంగతి తెలిసిందే. బివిఎస్ఎన్ ప్ర‌సాద్ నిర్మాత‌. ఈ చిత్రానికి ‘జాక్‌’ అనే టైటిల్ ఖ‌రారు చేసిన‌ట్టు తెలుగు 360 ముందే చెప్పింది. ఇప్పుడు దాన్నే అధికారికంగా ప్ర‌క‌టించింది చిత్ర‌బృందం. ఈ రోజు సిద్దు పుట్టిన రోజు. ఈ సంద‌ర్భంగా టైటిల్ తో మోష‌న్ పోస్ట‌ర్‌ని విడుద‌ల చేశారు. రెండు చేతుల్లోనూ రెండు గ‌న్స్ ప‌ట్టుకొని, స్టైలీష్ గా ఎంట్రీ ఇచ్చాడు సిద్దు జొన్న‌ల‌గ‌డ్డ‌. బొమ్మ‌రిల్లు భాస్క‌ర్ అంటే క్లాస్, ఫ్యామిలీ టైపు. కానీ ఈసారి యాక్ష‌న్‌, క్రైమ్ మిక్స‌యిన ఓ క‌థ‌ని ఎంచుకొన్నాడ‌ని తెలుస్తోంది. ‘టైటానిక్‌’లో హీరో పేరు ‘జాక్‌’. ఆ పేరుకీ ఈ క‌థ‌కూ ఏమైనా సంబంధం ఉందేమో చూడాలి. ఈ చిత్రంలో ‘బేబీ’ ఫేమ్ వైష్ణ‌వి క‌థానాయిక‌గా న‌టిస్తోంది. మ‌రోవైపు ‘టిల్లు స్క్వేర్‌’ విడుద‌ల‌కు సిద్ధ‌మైంది. మార్చి 29న ఈ చిత్రాన్ని విడుద‌ల చేస్తారు. ఈరోజు సిద్దు పుట్టిన రోజు సంద‌ర్భంగా రాత్రి 6 గంట‌ల‌కు ఓ ప్ర‌త్యేక‌మైన టీజ‌ర్‌ని వ‌దులుతున్నారు.