ప్ర‌స్తుతం ‘గేమ్ ఛేంజ‌ర్‌’ ప‌నుల్లో ఉన్నాడు రామ్ చ‌ర‌ణ్‌. ఈ సినిమాని వీలైనంత త్వ‌ర‌గా పూర్తి చేసి, బుచ్చిబాబుకి డేట్లు ఇవ్వాల‌నుకొంటున్నాడు. కానీ శంక‌ర్ మాత్రం ఇప్ప‌ట్లో వ‌దిలేట్టు లేడు. `గేమ్ ఛేంజర్‌`లో షూటింగ్ పార్ట్ ఇంకా మిగిలే ఉంది. పైగా చ‌ర‌ణ్‌తో తీయాల్సిన సీన్లు చాలానే బాకీ ఉన్నాయి. `గేమ్ ఛేంజ‌ర్‌` గ్యాప్‌లో బుచ్చిబాబు సినిమా మొద‌లెట్టేద్దామ‌నుకొంటే.. గెట‌ప్ అడ్డు క‌ట్ట వేస్తోంది. బుచ్చిబాబు సినిమా కోసం చ‌ర‌ణ్ ఒత్తైన జుత్తు పెంచాలి. గెడ్డం ఉండాలి. ఆ మేకొవర్‌కి టైమ్ ప‌డుతుంది. మ‌రోవైపు ‘గేమ్ ఛేంజ‌ర్‌’లో క్లీన్ షేవ్‌తో, కుర‌చ జుత్తుతో క‌నిపించాలి. ఈ రెండు గెట‌ప్పుల్లో చాలా తేడా ఉంది. అందుకే… బుచ్చిబాబుకి క‌మిట్ అవ్వ‌లేక‌పోతున్నాడు. ఒక‌వేళ బుచ్చిబాబు సినిమా మొద‌లెట్టేస్తే, ఈలోగా `గేమ్ ఛేంజ‌ర్‌` కోసం పిలుపు రావొచ్చు. అప్ప‌టిక‌ప్పుడు గెట‌ప్ ఛేంజ్ చేయ‌డం క‌ష్టం. అందుకే శంక‌ర్ సినిమా పూర్త‌య్యేంత వ‌ర‌కూ బుచ్చిబాబు సినిమా మొద‌లెట్టే అవ‌కాశాల్లేకుండా పోయాయి.

మేలో బుచ్చిబాబు సినిమా షూటింగ్ ప్రారంభం కానుంది. అప్ప‌టికి శంక‌ర్ వ‌దులుతాడా, లేదా? అనేది మిలియ‌న్ డాల‌ర్ల ప్ర‌శ్న‌. చ‌ర‌ణ్ వ‌చ్చేలోగా.. బుచ్చిబాబు మిగిలిన సీన్లు పూర్తి చేసుకోవాల్సిందే. ఈ సినిమాలో జాన్వీ క‌పూర్ క‌థానాయిక కావ‌డం దాదాపు ఖాయ‌మైంది. ప్ర‌తి నాయ‌కుడి పాత్ర‌లో శివ రాజ్ కుమార్ క‌నిపించ‌నున్నాడు.