వైసీపీ బీసీ విభాగం అధ్యక్షుడు జంగా కృష్ణమూర్తి యాదవ్ .. జగన్ రెడ్డి బీసీలకు చేస్తున్న అన్యాయాన్ని తెరపైకి తీసుకు వస్తూ సంచలన విషయాలను వెల్లడించారు. దాదాపుగా ఏడు నిమిషాల పాటు ఉన్న వీడియోను ఆయన విడుదల చేశారు. వైసీపీలో బీసీల పేరుతో ఎలా రాజకీయాలు చేస్తారో.. వారికి పదవుల పేరుతో ఎలా బలి పశువుల్ని చేస్తారో క్లుప్తంగా వివరించారు. నిజానికి అవన్నీ బయటకు అందరికీ తెలిసినవే. కానీ పదవి ఉంటే చాలు అధికారం లేకపోయినా పర్వాలేదనుకునే నేతల వల్ల వైసీపీ లో రెడ్ల ఆధిపత్యం అలా గడిచిపోతోంది.
జంగా కృష్ణమూర్తి యాదవ్ గత ఎన్నికలకు ముందు తెలంగాణ నుంచి యాదవ నేతల్ని తీసుకు వచ్చి తన నియోజకవర్గంలో భారీ బీసీ సభ నిర్వహించారు. టీడీపీ ప్రభుత్వంపై అప్పట్లో కుల విద్వేషం రెచ్చగొట్టడానికి చేసిన అనేక వ్యూహాల్లో ఆయన కూడా భాగమయ్యారు. తలసాని లాంటి వాళ్లను తీసుకొచ్చి తన వంతు సాయం చేశారు. అయితే జగన్ రెడ్డి మోసం చేశారు. ఆయనకు టిక్కెట్ ఇవ్వలేదు. కాసు మహేష్ రెడ్డికి ఇచ్చారు. ఆయనకు టీటీడీ చైర్మన్ పదవి ఇస్తామని ఆశ పెట్టారు. చివరికి అదీ ఇవ్వలేదు సరి కదా.. గురజాలలో ఆయన ప్రభావం లేకుండా చేసేందుకు ఎంత చేయాలో అంత చేశారు.
దీంతో ఆయన ఇటీవల వైసీపీ అధినేతపై అసహనం వ్యక్తం చేస్తూ వస్తున్నారు. ఇక ఆ పార్టీలో ఉంటే తనకు భవిష్యత్ లేదని ఆయనకు అర్థమైపోయింది. తన నియోజకవర్గంలో తనను అనామకుడ్ని చేస్తున్నారని క్లారిటీ రావడంతో ఆయన తిరుగుబాటు ప్రారంభించారు. మొదటి నుంచి జగన్ రెడ్డితో కలిసి నడిచిన ఆయన ఇప్పుడు తిరుగుబాటు చేశారు. ఆయన వేసిన ప్రశ్నలకు వైసీపీ నేతల దగ్గర ఆన్సర్ ఉండదు. వారికి తెలిసిన కౌంటర్ ఏమిటంటే.. బూతులతో విరుచుకుపడటమే.
