మైత్రీ మూవీస్‌కి భారీ లాభాల్ని అందించిన చిత్రాల్లో ‘ఉప్పెన’ ఒక‌టి. ఈ సినిమాతోనే సుకుమార్ శిష్యుడు బుచ్చిబాబు రంగ ప్ర‌వేశం చేశాడు. వైష్ణ‌వ్ తేజ్, కృతి శెట్టిల ఎంట్రీ కూడా ఈ సినిమాతోనే. ముఖ్యంగా బేబ‌మ్మ పాత్ర‌లో కృతిశెట్టి అందం, న‌ట‌న అంద‌రికీ న‌చ్చాయి. ఆమె క్యారెక్ట‌ర్ ఈ సినిమాకి ప్ర‌ధాన ఎట్రాక్ష‌న్ అయ్యింది. యువ‌త‌రాన్ని మ‌ళ్లీ మ‌ళ్లీ థియేట‌ర్ల‌కు ర‌ప్పించింది. ఇప్పుడు ఈ సినిమా బాలీవుడ్ కి వెళ్ల‌బోతోంది. బోనీక‌పూర్ ‘ఉప్పెన’ చిత్రాన్ని రీమేక్ చేయ‌డానికి స‌న్నాహాలు చేస్తున్నారు. బేబ‌మ్మ పాత్ర‌లో బోనీ కుమార్తె ఖుషి క‌పూర్ న‌టించ‌బోతున్న‌ట్టు స‌మాచారం. ఖుషి కోసం బోనీ క‌పూర్ చాలాకాలంగా క‌థ‌లు వింటున్నారు. అయితే ఏవీ ఓ ప‌ట్టాన న‌చ్చ‌డం లేదు. చివ‌రికి ‘ఉప్పెన’ సినిమాని ఖుషితో చేయాల‌ని ఫిక్స‌య్యార్ట. ఇప్ప‌టికే ఓ ద‌ర్శ‌కుడ్ని కూడా ఖాయం చేశార‌ని స‌మాచారం. హిందీ సీమ‌కు త‌గ్గ‌ట్టుగా క‌థ‌లో కొన్ని మార్పులూ, చేర్పులూ చేస్తున్నార‌ని స‌మాచారం. మైత్రీ మూవీస్ సంస్థ బాలీవుడ్ రీమేక్‌లోనూ భాగం పంచుకోబోతోంద‌ని తెలుస్తోంది. బాలీవుడ్ ‘ఉప్పెన’ గురించిన పూర్తి వివ‌రాలు ఇంకొద్దిరోజుల్లో వెల్ల‌డ‌వుతాయి.
బాలీవుడ్ లో ‘ఉప్పెన’.. బేబ‌మ్మ ఎవ‌రో?!
