తెలుగు చిత్ర‌సీమ‌కు సీక్వెల్స్‌ పెద్దగా కలిసిరాలేదు. ఒక విజయవంతమైన సినిమాకి కొనసాగింపుగా వచ్చిన దాదాపు సినిమాలు నిరాశపరిచాయి. నాగవల్లి, కిక్ 2, సర్దార్ గబ్బర్ సింగ్.. ఇలా చెప్పుకుంటూ పెద్ద జాబితానే వుంటుంది. ఇప్పుడు మరో క్రేజీ సీక్వెల్ ప్రేక్షకుల ముందుకు వస్తోంది. అదే ‘టిల్లు స్క్వేర్‌’. సిద్దు జొన్నలగడ్డ హీరోగా వచ్చిన టిల్లుకి సీక్వెల్ ఇది. రొమాంటిక్‌ క్రైమ్‌ కామెడీ గా వచ్చిన టిల్లు యూత్ ఆడియన్స్ లో మంచి ఫాలోయింగ్ తెచ్చుకుంది. టిల్లు మాటలు, చేతలు భలే నవ్వించాయి. మళ్ళీ అదే పాత్రని ఆధారంగా చేసుకొని 2 పార్ట్ ని తీశారు.
ఈ సీక్వెల్ కి దర్శకుడు మారాడు. అలాగే హీరోయిన్ ప్లేస్ లో కొత్త రాధికగా అనుపమ పరమేశ్వరన్ వచ్చింది. అయితే ఈ సినిమాపై ఆశ‌లు, అంచ‌నాలూ ఎక్క‌డా త‌గ్గ‌లేదు. అనుపమ మునుపెన్నడూ కనిపించనంత హాట్‌గా దర్శనమిచ్చి యువత మతి పోగొడుతోంది. తను క‌చ్చితంగా ఈ సినిమాకి ప్ల‌స్ పాయింటే. టీజర్, ట్రైలర్ మంచి బజ్ ని క్రియేట్ చేశాయి. టిల్లు డైలాగులు ఇప్ప‌టికే పాపుల‌ర్ అయిపోయాయి. ఈ వేసవిలో చాలా మంది ఎదురుచూస్తున్న సినిమాల్లో ఒకటి ‘టిల్లు స్క్వేర్‌’. ఇదే బజ్ తో సీక్వెల్ సెంటిమెంట్ ని కూడా దాటేస్తుందేమో చూడాలి. అదే జ‌రిగితే.. సీక్వెల్స్‌పై మ‌రింత మోజు పెరుగుతుంది. మార్చి 29న సినిమా ప్రేక్షకుల ముందుకు వస్తోంది.
