మెగాస్టార్ చిరంజీవి, జనసేన పార్టీకి రూ.5 కోట్ల విరాళాన్ని అందించారు. హైదరాబాద్ ముచ్చింతల్‌లో ‘విశ్వంభర’ షూటింగ్ లొకేషన్‌కు సోదరుడు నాగబాబుతో కలిసి వెళ్లిన జనసేన అధినేత పవన్‌ కల్యాణ్‌కు చెక్కు రూపంలో ఈ విరాళాన్ని అందజేశారు. ఈ సందర్భంగా చిరంజీవి పాదాలకు నమస్కరించి ఆశీర్వాదం తీసుకున్నారు పవన్. దీనికి సంబధించిన వీడియోలు, ఫోటోలు ఇప్పుడు సోషల్ మీడియాలో వైరల్ అవుతున్నాయి. చాలా రోజుల తర్వాత ముగ్గురు మెగా బ్రదర్స్ ఒకే ఫ్రేం లో కనిపించడం అభిమానులకు ట్రీట్ అనే చెప్పాలి.

ఇదే సందర్భంలో ‘విశ్వంభర’ లో మెగాస్టార్ ఎలా కనిపించబోతున్నారో అనేదానిపై కూడా క్లారిటీ వచ్చింది. ఇప్పటివరకూ ‘విశ్వంభర’ షూటింగ్ స్టిల్ బయటికి వదల్లేదు. ఇప్పుడది బయటికి వచ్చింది. పవన్ తో భేటి సందర్భంగా రిలీజ్ చేసిన ఫోటోల్లో చిరు లుక్ ప్రత్యేకంగా ఆకర్షించింది. ‘విశ్వంభర’లో భీమవరం దొరబాబు పాత్రలో కనిపించనున్నారు చిరు. ఇప్పుడు బయటికి వచ్చిన స్టిల్ ఆ పాత్రదే. మెడలో చెయిన్, బంగారు వర్ణం కళ్ళజోడు, కలర్ ఫుల్ చొక్కాలో కనిపించారు చిరు. లుక్ చాలా యంగ్ గా వుంది. హెయిర్ స్టయిల్ కూడా బాగా కుదిరింది. అన్నయ్య, మాస్టర్ సినిమాల వైబ్ ని గుర్తుకుతెచ్చింది. మొత్తానికి చిరంజీవిని వింటేజ్ అవతార్ లోనే ప్రజెంట్ చేస్తున్నాడు వశిష్ట. ప్రస్తుతం షూటింగ్ శరవేగంగా జరుగుతోంది. యువీ క్రియేషన్స్ భారీ బడ్జెట్ తో నిర్మిస్తోన్న ఈ చిత్రంలో త్రిష హీరోయిన్.