క‌ల్యాణ్ రామ్ క‌థానాయ‌కుడిగా న‌టించిన ‘బింబిసార‌’ బాక్సాఫీసు ద‌గ్గ‌ర మంచి విజ‌యాన్ని అందుకొంది. ఈ చిత్రానికి సీక్వెల్ కూడా తీస్తున్నారు. అయితే ఇప్పుడు ఈ త‌ర‌హా క‌థ‌తోనే త‌మిళంలో ఓ సినిమా రూపొందిస్తున్న‌ట్టు ఇన్ సైడ్ వ‌ర్గాలు చెబుతున్నాయి. సూర్య క‌థానాయ‌కుడిగా న‌టించిన `కంగువా` క‌థ‌కూ, బింబిసార‌కూ పోలిక‌లు ఉన్నాయ‌ట‌. బింబిసార‌లో… హీరో గ‌తం నుంచి వ‌ర్త‌మానంలోకి వ‌స్తాడు. ‘కంగువా’ క‌థ కూడా అంతేన‌ని టాక్‌. గ‌తంలో ఉన్న హీరో నెగిటీవ్ ల‌క్ష‌ణాల‌తో ఉంటాడు, వ‌ర్త‌మానంలోకి వ‌చ్చాక త‌న త‌ప్పుల్ని తెలుసుకొంటాడు. ‘కంగువా’ క‌థ‌లో కూడా హీరో క్యారెక్ట‌రైజేష‌న్ ఇలానే ఉండ‌బోతోంద‌ని స‌మాచారం. ఓ ర‌కంగా `బింబిసార‌`కు ఇది ఫ్రీమేక్ అయి ఉండొచ్చ‌న్న‌ది సినీ పండితుల మాట‌. మ‌రోవైపు రెండు క‌థ‌ల‌కూ ఓ హాలీవుడ్ చిత్రం మూల‌మ‌ని, దాన్ని త‌మ భాష‌లోని ప్రేక్ష‌కుల అభిరుచికి త‌గ్గ‌ట్టుగా రూపొందించార‌ని చెప్పుకొంటున్నారు. శివ ద‌ర్శ‌క‌త్వం వ‌హించిన ఈ చిత్రం భారీ వ్య‌య ప్ర‌యాస‌ల‌తో తెర‌కెక్కించారు. టీజ‌ర్‌లో.. ఓ స‌రికొత్త ప్ర‌పంచాన్ని ఆవిష్క‌రించాడు ద‌ర్శ‌కుడు శివ‌. సూర్య కెరీర్‌లోనే భారీ బ‌డ్జెట్ చిత్ర‌మిది. దిశాప‌టానీ క‌థానాయిక‌గా న‌టించిన ఈ చిత్రాన్ని త్వ‌ర‌లోనే విడుద‌ల చేస్తారు. జ్ఞాన‌వేల్, వంశీ ప్ర‌మోద్ ఈ చిత్రానికి నిర్మాత‌లు.