బెల్లంకొండ సాయి శ్రీ‌నివాస్ 11వ చిత్రానికి సంబంధించి శ్రీ‌రామ‌న‌వ‌మి రోజున అధికారికంగా ప్ర‌క‌ట‌న వ‌చ్చేసింది. ఈ చిత్రానికి సాహు గార‌పాటి నిర్మాత‌. కౌశిక్ పెగ‌ళ్ల‌పాటి ద‌ర్శ‌కుడిగా ప‌రిచ‌యం అవుతున్నారు. ఇదోక హార‌ర్ మిస్ట‌రీ అని ఫ‌స్ట్ గ్లింప్స్‌తోనే చిత్ర‌బృందం ప‌రోక్షంగ‌టా చెప్పేసింది. తెలుగు 360కి తెలిసిన ఇన్ సైడ్ న్యూస్ ఏమిటంటే.. ఈ చిత్రానికి ‘కిష్కింద‌పురి’ అనే టైటిల్ దాదాపు ఖాయ‌మైపోయింది. ఇదే టైటిల్‌ని త్వ‌ర‌లోనే అధికారికంగా ప్ర‌క‌టించ‌బోతున్నారు.

‘కిష్కింద‌పురి’ అనేది ఓ ఊహాజ‌నిత ప్ర‌దేశం. ఈ సినిమా క‌థంతా ఆ ఊరి చుట్టే తిర‌గ‌బోతోంది. కోతుల‌కూ, ఈ క‌థ‌కూ ఓ చిన్న‌పాటి లింక్ ఉంది. అందుకే ‘కిష్కింద‌’ అనే ప‌దం టైటిల్ లోకి తీసుకొచ్చారు. హార‌ర్ క‌థ‌ని, మిస్ట‌రీ కోణంలో మొద‌లెట్టి, చాలా ఆస‌క్తిక‌రమైన ట్విస్టుల‌తో ముందుకు తీసుకెళ్లేంత మెటీరియ‌ల్ ఈ క‌థ‌లో ఉంది. అందుకే బెల్లంకొండ తొలిసారి త‌న కెరీర్‌లో ఓ హార‌ర్ సినిమా ఒప్పుకొన్నాడు. అజ‌నీష్‌లోక్ నాథ్ ఈ చిత్రానికి సంగీతం అందిస్తున్నారు. క‌థానాయిక‌, ఇత‌ర వివ‌రాలు త్వ‌ర‌లో ప్ర‌క‌టిస్తారు. మ‌రోవైపు బెల్లంకొండ న‌టిస్తున్న ‘టైస‌న్ నాయుడు’ చిత్రీక‌ర‌ణ జ‌రుగుతోంది. అది బెల్లంకొండ‌కు 10వ సినిమా. 12వ చిత్రానికి సంబంధించిన పనులూ మొద‌లైపోయాయి. ఈ చిత్రంతో ఓ కొత్త ద‌ర్శ‌కుడ్ని ప‌రిచ‌యం చేయ‌నున్నారు. విష‌యం ఏమిటంటే 11వ సినిమా షూటింగ్ కంటే 12వ సినిమా షూటింగ్ ముందు మొద‌లుపెడ‌తారు. కానీ విడుద‌ల మాత్రం సంఖ్యాప‌రంగానే ఉంటుంది.