హారర్ సినిమా అనగానే ఆడియన్స్ లిమిట్ అయిపోతారు. స్టార్ హీరోలు ఈ కథలని వినడానికి పెద్ద ఆసక్తి చూపించారు. కానీ చాలా మంది ఫిల్మ్ మేకర్స్ కి హారర్ సినిమాలంటే క్రేజ్. నిజానికి రామ్ గోపాల్ వర్మ ‘శివ’ కథ కంటే ముందు నాగార్జున కు ఒక హారర్ కథే చెప్పారు. కానీ నాగార్జున ఆ జోనర్ ఇష్టం లేదు. దీంతో ‘శివ’ ముందుకు వచ్చింది. అయితే అప్పటికి ఇప్పటికీ ఆడియన్స్ అభిరుచుల్లో చాలా మార్పులు వచ్చాయి. ఇప్పుడు థియేటర్స్ కి వచ్చి భయపడటానికి ప్రేక్షకులు ఆసక్తి చూపిస్తున్నారు.
మసూద, విరూపాక్ష సినిమాల విజయాలు ఇందుకు నిదర్శనం. నిజానికి హారర్ సినిమాలకు బ్లాక్ బస్టర్ అనే టైటిల్ పడదు. కానీ కొన్నాళ్ళుగా ఈ ట్రెండ్ లో మార్పు వచ్చింది. విరూపాక్ష టెర్రిఫిక్ బ్లాక్ బస్టర్ గా ప్రేక్షకులకు థ్రిల్ పంచింది. మసూద కూడా ప్రేక్షకులు వెన్నులో వణుకుపుట్టించే సినిమాగా నిలిచింది. ఈ రెండు విజయాలు ఇచ్చిన ప్రేరణతో మరిన్ని హారర్ సినిమాలు ప్రేక్షకుల ముందుకు రావడానికి సిద్ధమౌతున్నాయి.
దిల్ రాజు నిర్మాణంలో హారర్ సినిమాగా ‘లవ్ మీ’ రెడీ అవ్వడం విశేషం. ఆశిష్, వైష్ణవి చైతన్య జంటగా నటించిన ఈ సినిమాలో ఓ దెయ్యం ప్రేమకథని చూపించబోతున్నారు. ఆస్కార్ విజేత కీరవాణి, వెటరన్ డివోపీ పీసీ శ్రీరామ్ లాంటి దిగ్గజ నిపుణులు ఈ సినిమాకి పనిచేయడం మరో విశేషం. దిల్ రాజు ఇప్పటివరకూ ఫ్యామిలీ, యూత్ ఫుల్ సినిమాలే నిర్మించారు. ఇప్పుడు తొలిసారిగా హారర్ టచ్ వున్న ఈ కథ చేయడం ఈ ట్రెండ్ లో వచ్చిన మార్పులకు అద్దం పడుతోంది. మేలో ఈ సినిమా వస్తోంది.
బెల్లం కొండసాయి శ్రీనివాస్ ఓ మిస్టరీ హారర్ సినిమా చేస్తున్నారు. ఈ సినిమాకి కిష్కిందపురి అనే పేరు పరిశీలనలో వుంది. వానరాలకు కథతో లింక్ వుందని అందుకే ఈ టైటిల్ ని ఎంపిక చేసే ఆలోచనలో వున్నారని తెలుస్తోంది. ఇదివరకూ రాక్షకుడితో సైకో థ్రిల్లర్ ని ప్రయత్నించారు శ్రీనివాస్. ఆ సినిమా మంచి విజయాన్ని ఇచ్చింది. ఇప్పుడు తొలిసారి హారర్ టచ్ తో వస్తున్నారు.
తమన్నా ప్రధాన పాత్రలో రూపుదిద్దుకుంటున్న ఓదెల 2లో కూడా హారర్ ఎలిమెంట్స్ వుంటాయి. ఇందులో తమన్నా నాగసాధుగా కనిపించబోతుంది. గ్రామదేవతలు నేపధ్యం వున్న ఈ సినిమా షూటింగ్ ప్రస్తుతం జోరుగా జరుగుతోంది. హారర్ ఆధ్యాత్మిక అంశాలు కలబోతగా వస్తున్న ఈ సినిమాలో గాఫిక్స్ వర్క్ కూడా అధికంగా ఉండబోతుంది.
సూపర్ హిట్ విరూపాక్షకి సీక్వెల్ గా మరో సినిమాకి సన్నాహాలు జరుగుతున్నాయి. విరూపాక్షలో హారర్ ఎలిమెంట్స్ ప్రేక్షకులకు సరికొత్త అనుభూతిని ఇచ్చాయి. అలాంటి థ్రిల్ కోసం మరోసారి ఎదురుచూస్తున్నారు. ఆ అంచనాలను తగ్గట్టుగానే రెండో పార్ట్ కోసం కథ సిద్ధమౌతోంది. అలాగే మసూదకు కొనసాగింపుగా మరో హారర్ కథ ప్రేక్షకుల మందుకు రాబోతోంది. చిన్న సినిమాగా పెద్ద విజయం సాధించిన ‘పోలిమేర3’ కి కూడా ఏర్పాట్లు జరుగుతున్నాయి.
అన్నటి కంటే ముఖ్యంగా పాన్ ఇండియా స్టార్ ప్రభాస్ ఓ హారర్ కథ చేస్తున్నారు. మారుతి దర్శకత్వంలో ప్రభాస్ చేస్తున్న రాజా సాబ్ లో హారర్ టచ్ వుంది. మారుతిని వెలుగులో తెచ్చింది హారర్ జోనరే. కామెడీ హారర్ గా వచ్చిన ‘ప్రేమకథా చిత్రం’ సంచలన విజయం సాధించింది. నిజానికి హారర్ లో కామెడీ మిక్స్ చేసిన క్రెడిట్ మారుతికి దక్కుతుంది. ఇప్పుడాయన ఏకంగా ప్రభాస్ తోనే హారర్ టచ్ వున్న ఒక యూనిక్ కాన్సెప్ట్ తో ‘రాజా సాబ్’ చేస్తున్నారు. ఇందులో సంజయ్ దత్ కూడా కీలక పాత్ర పోహిస్తున్నారు. ఆయన పాత్ర ఆత్మలా వుంటుందని సమాచారం. రాజా సాబ్ గనుక విజయం సాధిస్తే టైర్ 1 హీరోలు కూడా ఇక హారర్ కథని ఒక మెయిన్ స్ట్రీమ్ జోనర్ గా చూసే అవకాశం పుష్కలంగా వుంది.
