‘బాహుబలి’ సినిమా సైజ్ ని పెంచింది. ప్రేక్షకులందరికీ థియేటర్స్ లోకి తీసుకురాగలిగితే బాక్సాఫీసు వద్ద ఎలాంటి మాయ చేయొచ్చు నిరూపించింది. సినిమా కథకు కూడా కొత్త ఈక్వేషన్ ఇచ్చింది. బహుబలికి ముందు దాదాపు కథలన్నీ ఒక సినిమాలోనే పూర్తయ్యేవి. కానీ బాహుబలి కొనసాగింపు కథలకు కొత్త ఊపిరి పోసింది. బాహుబలి తర్వాత వచ్చిన దాదాపు పెద్ద సినిమాలు రెండు పార్ట్ లు రావడం మొదలుపెట్టాయి. ఇప్పుడు దాదాపు పాన్ ఇండియా సినిమాలు రెండు భాగాలే. ఇప్పటికే ఇందులో కొన్ని సినిమాలు కొనసాగింపు కథలు వస్తే.. ఇప్పుడు మరిన్ని కథలు రెండో భాగంతో రెట్టింపు విజయాలు అందుకోవడానికి సిద్ధమౌతున్నాయి.

ఆగస్ట్ లో పుష్ప 2 సందడి మొదలైపోతుంది. అల్లు అర్జున్ కెరీర్ లో మైల్ స్టోన్ మూవీ ఇది. సుకుమార్‌ తెరకెక్కించిన ‘పుష్ప: ది రైజ్‌’ అదిరిపోయే విజయాన్ని అందుకుంది. ‘పుష్ప’ మ్యానరిజం తెగ వైరల్ అయ్యింది. పుష్ప చిత్రానికి గానూ జాతీయ ఉత్తమ నటుడు అవార్డ్ అందుకొని, జాతీయ అవార్డ్ అందుకున్న తొలి తెలుగు హీరోగా చరిత్ర సృష్టించారు అల్లు అర్జున్. ఇప్పుడు రెండో భాగం `పుష్ప ది రూల్’ విడుదలకు రంగం సిద్ధమైంది. తొలి భాగం సంచలన విజయం సాధించడంతో రెండో భాగంపై అంచనాలు వున్నాయి. దానికి తగ్గట్టుగానే సుకుమార్ సినిమాని తీర్చిదిద్దుతున్నారు. ఇప్పటికే బయటికి వచ్చిన టీజర్ అంచనాలు పెంచింది. ఆగస్టు 15న పుష్ప గాడి బాక్సాఫీసు రూల్ షురూ అవుతోంది.

కమల్ హసన్ ‘భారతీయుడు 2’తో ప్రేక్షకుల ముందు రాబోతున్నారు. కమల్ హసన్, శంకర్‌ కలయికలో సంచలనం సృష్టించింది ‘భారతీయుడు’. చిత్రానికి కొనసాగింపుగా ‘భారతీయుడు 2’ తీసుకొస్తున్నారు. జూన్ లో ఈ సినిమాని ప్రేక్షకుల ముందు తీసుకురావడానికి ప్లాన్ చేస్తున్నారు. భారతీయుడు ఓ ట్రెండ్ సెట్టర్. దీనికి సీక్వెల్ కావడం, ‘విక్రమ్’ తర్వాత కమల్ నుంచి వస్తున్న సినిమా కావడంతో భారతీయుడు’2పై భారీ అంచనాలు వున్నాయి. ‘ఇస్మార్ట్‌ శంకర్’ తో మాస్ విందు అందించారు హీరో రామ్‌, దర్శకుడు పూరి పూరి జగన్నాథ్‌. ఇప్పుడీ ఇద్దరూ కలసి ఆ కథకు కొనసాగింపుగా ‘డబుల్‌ ఇస్మార్ట్‌’ చేస్తున్నారు. బాలీవుడ్ స్టార్ సంజయ్ దత్ ఈ చిత్రంలో ఓ కీలక పాత్రలో కనిపిస్తున్నారు. ఇప్పటికే షూటింగ్ చివరి దశకు వచ్చింది. త్వరలోనే రిలీజ్ డేట్ ని అనౌన్స్ చేశారు. అడవి శేష్‌ కెరీర్ గాడిలో పెట్టిన సినిమా ‘గూఢచారి’. 2018లో వచ్చిన ఈ సినిమా మంచి విజయాన్ని అందుకుంది. ఇప్పుడు ఈ సినిమాకు సీక్వెల్‌గా ‘గూఢచారి2’రాబోతోంది. ఈ ఏడాదిలోనే సినిమా ప్రేక్షకుల ముందుకు రానుంది.

పెద్ద అంచనాలు లేకుండా విడుదలై.. పాన్‌ ఇండియా స్థాయిలో సంచలన విజయాన్ని అందుకొని సత్తా చాటింది ‘కాంతార’. రూ.15కోట్లతో నిర్మితమైన ఈ సినిమా ప్రపంచవ్యాప్తంగా దాదాపు రూ.400కోట్ల వసూళ్లు రాబట్టి బాక్సాఫీసు వద్ద సంచలనం నమోదు చేసింది. ఇప్పుడీ చిత్రానికి కొనసాగింపుగా ‘కాంతార2’ పట్టాలెక్కింది. తొలి భాగం కథ ఎక్కడైతే ప్రారంభమైందో.. దానికి ముందు జరిగిన కథను ఇందులో చూపించబోతున్నారు. ప్రభాస్ అభిమానులు ఆకలి తీరిచ్బింది ‘సలార్‌ పార్ట్‌-1: సీజ్‌ ఫైర్‌. దర్శకుడు ప్రశాంత్‌ నీల్‌, ప్రభాస్ లోని మాస్ ని తెరపై చూపించిన తీరు ప్రేక్షకులని అబ్బురపరిచింది. ప్రభాస్ యాక్షన్ విశ్వరూపం బాక్సాఫీసు వద్ద కలెక్షన్ల వర్షం కురిపించింది. ఇప్పుడీ సినిమా పార్ట్ కోసం ఫ్యాన్స్ ఆసక్తిగా ఎదురుచూస్తున్నారు. పార్ట్‌ 2ను ‘శౌర్యాంగ పర్వం’ పేరుతో రూపొందించనున్నారు. ఎన్నో ప్రశ్నలతో మొదటి భాగాన్ని ముగించిన ప్రశాంత్‌ నీల్.. రెండో పార్ట్‌లో వాటికి ఎలాంటి సమాధానాలు చెబుతారో అని ప్రేక్షకులు ఈ సీక్వెల్‌ కోసం ఉత్సాహంగా ఎదురుచూస్తున్నారు.

అర్జున్ రెడ్డితో ట్రెండ్ సెట్టింగ్ సినిమాని అందించిన దర్శకుడు సందీప్ రెడ్డి వంగా.. యానిమల్ తో పాన్ ఇండియా స్థాయిలో సంచలనం సృష్టించాడు.ఈ సినిమాకి సీక్వెల్ ‘యానిమల్‌ పార్క్‌’ ఉంటుందని ప్రకటించిన విషయం తెలిసిందే. ఇందులో యానిమల్ కంటే వైల్డ్ పాత్రలు ఉంటాయని చెప్పి ఇప్పటికే మరింత ఆసక్తిని పెంచారు సందీప్. ప్రస్తుతం ఆయన ప్రభాస్‌ ‘స్పిరిట్‌’ చిత్రాన్ని తెరకెక్కించే సన్నాహాల్లో వున్నారు. ఈ సినిమా తర్వాత యానిమల్ పార్క్ ని సెట్స్ పైకి తీసుకెళ్తారు. ప్రేక్షకులు ఎంతగానో ఎదురుచూస్తున్న కొనసాగింపు సినిమాల్లో జైహనుమాన్ ఒకటి. చిన్న సినిమాగా వచ్చిన హనుమాన్ పెద్ద విజయాన్ని అందుకుంది. అద్భుతమైన వసూళ్ళతో ఈ ఏడాది సంక్రాంతి విజేతగా నిలిచింది. ఈ సినిమాకి కొనసాగింపుగా జైహనుమాన్ ను రూపొందించనున్నారు ప్రశాంత్ వర్మ. నిన్న హనుమాన్ జయంతి సందర్భంగా ఓ పోస్టర్ కూడా వదిలారు. అందులో కనిపించిన డ్రాగన్ ఆసక్తిని పెంచింది. హనుమాన్ సంచలన విజయం సాధించడంతో జై హనుమాన్ పై సహజంగానే మంచి అంచనాలు నెలకొన్నాయి. వీటితో పాటు అఖండ 2 ప్రకటన కూడా త్వరలో రాబోతుంది. అలాగే విరూపాక్ష 2, కార్తికేయ 3 లాంటి క్రేజీ ప్రాజెక్ట్స్ కొనసాగింపు కథలతో అదరగొట్టడానికి మరిన్ని హంగులతో ముస్తాబౌతున్నాయి.