మాజీ మంత్రి, TDP నాయకుడు గంటా శ్రీనివాసరావు… వాస్తవానికి విశాఖ జిల్లాకు వలస వచ్చిన నాయకుడే అయినా… దాదాపు పాతికేళ్ళుగా ఓటమి ఎరుగని నాయకుడుగా ఉండటంతో స్థానికుడు అయిపోయాడు. ఎన్నికలు వస్తున్నాయి అంటే… విశాఖ జిల్లాలో రిజర్వుడు నియోజకవర్గాల్లో తప్ప.. మిగతా నాయకుల అందరి గుండెల్లో ‘గంటా’ అనే రైలు పరిగెడుతూ ఉంటుంది. అలాగే ప్రజల్లో కూడా ఆసక్తి నెలకొంటూ ఉంటుంది… ఈ ‘గంటా శ్రీనివాసరావు’ ఏ నియోజక వర్గంలో పోటీ చేస్తారా అని!
ఈసారి గంటా శ్రీనివాసరావు విశాఖ జిల్లాలోనే ఎంతో ప్రత్యేకమైన భీమిలి లో పోటీ చేస్తున్నారు. అది కూడా తన దగ్గరే రాజకీయం నేర్చుకుని, నాయకుడిగా ఎదిగి, రాష్ట్ర మంత్రిగా పనిచేసిన ముత్తంశెట్టి (అలియాస్) అవంతి శ్రీనివాసరావు మీద. ఒకప్పుడు ఒకే పార్టీలో ఉన్న వీరిద్దరూ ఇప్పుడు వేర్వేరు పార్టీల్లో ఉండటం… ప్రత్యర్ధులుగా నిలవడం గమనార్హం. దీంతో ఇద్దరూ తమ వ్యూహ-ప్రతి వ్యూహాలకు పదునుపెడుతున్నారు.
ఇటు గంటా – అటు అవంతి ఇద్దరూ ఒకే సామాజిక వర్గానికి చెందినవారు కావడం ఒకెత్తు అయితే… ఇద్దరూ భీమిలిలో గతంలో గెలుపొందినవారే కావడం… మరో ఎత్తు. ఇద్దరి పేర్లలోనూ శ్రీనివాసరావు ఉండటం మరో సారుప్యత. ఇక్కడ సీనియర్ అయిన గంటాకు, తన శిష్యుడయిన అవంతి యొక్క బలం, బలహీనతలు పూర్తిగా తెలుసు. దీంతో NDA తరపున భీమిలి టికెట్ ను తనకు ప్రకటించిన మరుక్షణం నుంచే ‘గంటా మార్క్’ రాజకీయం చేయడం ప్రారంభించారు. వైసీపీ లోని ముఖ్య నాయకులను సామ దాన భేద దండోపాయాలతో తనవైపు గంటా తిప్పుకున్నారని పలువురు పేర్కొంటున్నారు. భీమిలీలో వైఎస్సార్ సిపీకి చెందిన పలువురు నాయకులు ఆ పార్టీకి గుడ్ బై చెప్పారు. ముఖ్యంగా విశాఖ జిల్లా పశుగణాభివృద్ది సంఘం చైర్మన్, భీమిలి మండల YCP జెడ్పీటీసీ నాయకుడు గాడు వెంకటప్పడు తన అనుచరులతో కలిసి ఆ పార్టీకి రాజీనామా చేసి, గంటా సమక్షంలో టీడీపీ తీర్థం పుచ్చుకున్నారు. గత ఎన్నికల్లో విశాఖ ఉత్తర నియోజక వర్గం నుంచి గెలుపొందిన గంటా… భీమిలికి వచ్చీ రావడంతోనే పెద్ద విక్కేట్ ని పట్టేయడంతో YCP శ్రేణులు డీలా పడిపోయాయి. ఇంకా పలువురు గ్రామ సర్పంచులు… గంటాకు మద్దతు ఇస్తుండటం YCPకి పెద్ద దెబ్బగా మారుతోంది.
2014లో భీమిలి నియోజక వర్గం నుంచే గెలిచిన గంటా… మంత్రి గా పనిచేశారు. అప్పటి పరిచయాలు ఇప్పుడు ఆయనకు బాగా కలిసి వస్తున్నాయని, దాంతోనే నియోజకవర్గంలో నాయకులూ, కార్యకర్తలు తిరిగి గంటా గూటికి చేరుతున్నారని TDP శ్రేణులు చెబుతున్నాయి. ఈ నేపథ్యంలో… సాధారణంగానే TDPకి కంచుకోట అయిన భీమిలిలో గెలుపు అవకాశాలు ఈసారి గంటాకే ఎక్కువగా ఉన్నాయని సర్వేలు చెబుతున్నాయి.
