టీ20 ప్ర‌పంచ‌క‌ప్ కోసం టీమిండియా ఆట‌గాళ్లు, కోచింగ్ సిబ్బంది న్యూయార్క్ వెళ్ళగా జట్టుతోపాటు వైస్ కెప్టెన్ హార్దిక్ పాండ్యా కనిపించకపోవడం చర్చనీయాంశం అవుతోంది. ఆయన వ్యక్తిగత జీవితానికి సంబంధించిన వ్యవహారంలో చిక్కుముడులు తలెత్తడంతోనే న్యూయార్క్ కు పాండ్యా ఆలస్యంగా వెళ్లనున్నారా..? అనే చర్చ జరుగుతోంది.

హార్దిక్ పాండ్యా, అతని భార్య నటాసా స్టాంకోవిక్ మధ్య చెడిందని, ఇద్దరూ విడాకులు తీసుకోనున్నారని కొద్దిరోజులుగా ప్రచారం జరుగుతోంది. వీటిపై అటు పాండ్యా కాని, ఇటు నటాసా కాని స్పందించకపోవడంతో ఊహాగానాలు మరింత తీవ్రతరం అయ్యాయి. ఈ క్రమంలోనే టీ20 ప్ర‌పంచ‌క‌ప్ కోసం న్యూ యార్క్ వెళ్ళిన టీమిండియా ఆటగాళ్లలో హార్దిక్ కనిపించకపోవడంతో వీరిద్ద‌రు విడాకులు తీసుకోనున్నారు అనే పుకార్లకు మరింత బ‌లాన్ని చేకూర్చింది.అయితే హార్దిక్ పాండ్య ఎక్కడ..? ఎందుకు న్యూ యార్క్ వెళ్ళలేదు అనే ప్రశ్నలు తెరపైకి వస్తున్నాయి.

ఐపీఎల్ లో ముంబై ఇండియన్స్ కథ ముగిసిన వెంటనే పాండ్య విదేశాలకు వెళ్ళాడని ప్రచారం జరుగుతోంది. ఈ సీజన్ లో తను సారధ్యం వహించిన ముంబై తీవ్రంగా నిరాశపరచడంతో పాటు వ్యక్తిగత జీవితంలో తలెత్తిన వివాదంతో మానసిక ప్రశాంతత కోసం విదేశాలకు వెళ్ళినట్లుగా చెబుతున్నారు. ఈ కారణంగానే పాండ్య న్యూ యార్క్ ప్లైట్ మిస్ అయ్యాడని, మొదటి ప్రాక్టీస్ సెషన్ వరకు జట్టులో చేరుతాడని తెలుస్తోంది.