మంచు విష్ణు చాలా ప్ర‌తిష్టాత్మ‌కంగా తెర‌కెక్కిస్తున్న సినిమా ‘క‌న్న‌ప్ప‌’. విష్ణు ఒక్క‌డే ఈ సినిమా చేస్తే పెద్ద‌గా బజ్ ఉండేది కాదేమో..? ఈ సినిమా నిండా స్టార్స్‌ని మోహ‌రించే స‌రికి, మంచు వారి సినిమాల‌కు ఇది వ‌ర‌కెప్పుడూ రానంత బ‌జ్ ఈ సినిమాకు వ‌చ్చేసింది. అన్నింటికంటే ముఖ్యంగా ఈ సినిమాలో ప్ర‌భాస్ అతిథి పాత్ర అనేస‌రికి ఆ ఫోక‌స్ మ‌రింత ఎక్కువైంది. శుక్ర‌వారం ‘క‌న్న‌ప్ప‌’ టీజ‌ర్ వ‌స్తోంది. ఈ సినిమా టెక్నిక‌ల్ గా ఎలా ఉందో, అందుకోసం చిత్ర‌బృందం ఎంత క‌ష్ట‌ప‌డిందో, క‌న్న‌ప్ప‌గా విష్ణు ఎంత సెట్ అయ్యాడో… టీజ‌ర్ ద్వారా ఓ అవ‌గాహ‌న‌కు రావొచ్చు.

ప్ర‌భాస్ ఈ సినిమాలో ఏ పాత్ర‌లో క‌నిపిస్తాడ‌న్న విష‌యంలో ఇప్పటి వ‌ర‌కూ స్ప‌ష్ట‌త లేదు. అవ‌ధూత‌గా ప్ర‌భాస్ ఎంట్రీ ఇస్తాడ‌ని, నందీశ్వ‌రుడిగా న‌టించాడ‌ని ర‌క‌ర‌కాల రూపాల్లో ప్ర‌చారం జ‌రుగుతోంది. అయితే ‘క‌న్న‌ప్ప‌’ టీజ‌ర్‌లో ఈ విష‌యంపై ఓ క్లారిటీ రాబోతోంది. `క‌న్న‌ప్ప‌` టీజ‌ర్ చివ‌రి షాట్ లో.. ప్ర‌భాస్ ఎంట్రీ ఇవ్వ‌బోతున్నాడ‌ని టాక్‌. కొన్ని సెక‌న్ల పాటు క‌నిపించే ఈ షాట్ లో ప్ర‌భాస్ పాత్ర గురించిన క్లూ ఇవ్వ‌బోతోంది టీమ్‌. అందుకే ప్ర‌భాస్ ఫ్యాన్స్ కూడా ‘క‌న్న‌ప్ప‌’ టీజ‌ర్ కోసం ఆస‌క్తిగా ఎదురు చూస్తున్నారు.